漫遊毒物

你已經死了《真．北斗無雙》

2012年12月26日 ~~ 第292期 Face

仲記得兩年前大家對《三國無雙》已玩到了無新意，所以一見到可以換上拳四郎、雷奧等角色嘅《北斗無雙》，個個都仆去買！可惜玩落就覺唔對路，皆因除咗畫面靚之外，角色動作窒窒吓，操作完全唔流暢。最慘連敵人都唔多，版面冷冷清清，冇晒《無雙》嘅爽快感，同拳四郎名句：「你已經死了」一樣，玩兩玩就擺低。好在啱啱新出嘅《真．北斗無雙》，一次過解決前作問題，玩落極爽，令人勁有打 10個嘅快感！

機種： PS3、 XBox360
廠商： Koei
類型： ACT
人數： 1人（單機）/最多 8人（網絡）
售價：$600

操作爽快　場面升呢

萬變不離其宗，無雙系列玩法都離不開跟故事喺版面上打完卒仔打大佬。今次《真．北斗無雙》嘅 story mode玩法都同上集差唔多，但繼〈雷奧篇〉後，就追加〈天帝篇〉同漫畫最後嘅〈修羅之國篇〉，等你可以操控或同元斗皇拳嘅法魯戈、南斗五車星、北斗琉拳加奧等決一死戰，包你冇咁快厭。最抵讚係遊戲節奏大大改進，將跳躍改為閃避指令，等你可以閃身駁招夠晒爽！而同一畫面下亦可以處理過百人嘅打鬥場面，可見廠商有誠意改善上集勁窒嘅缺點。

上集出招窒窒吓，今集終於似《三國無雙》咁爽快，用南斗紅鶴拳尤達大開殺戒，愈殘忍先夠北斗味。

唔單只傻吓傻吓唔識攻擊人，上集嘍囉連人數都唔夠多，今集終於迫滿成個畫面，咁先配法魯戈用元斗皇拳一招掃晒佢哋嘛！

注目登場人物

元斗皇拳
金色將軍法魯戈

南斗五車星
雲之重佐

北斗神拳
繼承者拳四郎

北斗琉拳
第一羅將加奧

南斗五車星
山之不動

畫面照舊　上網組 dream team

反而畫面方面就冇乜升呢，可能前作已發揮主機極限，所以不論普通戰鬥畫面定過場動畫都差唔多，好在見到仁星修迪搬石頭或拯救山之不動嘅名場面，仍能令 fans熱血沸騰！除咗 story mode，亦有上網玩嘅〈幻鬥篇〉，筆者較喜歡「雙人配對」玩法，等你可以同其他玩家合作一齊打敵人或完成不同關卡 mission。另外，仲有最多可以由 8位玩家分成兩隊，鬥快爭據點嘅「小隊配對」玩法，玩落似拳腳版《 COD》，更可組成南斗聖拳鬥北斗神拳嘅夢幻對決，夠晒感動！

之前嘅跳躍指令近乎多餘，今集肯改為閃避，絕對有聽 game迷心聲，等玩家可以隨時反擊再駁招。

畫面就冇乜大進步，不過都算靚，而且見到雷奧同拳四郎，細個練拳嘅名場面，都算值回票價。

南斗孤鷲拳同紅鶴拳 dream team合作！喺〈幻鬥篇〉可以俾你自由配搭不同角色合作出戰，漫畫中都冇嘅阿舜拍尤達，擋者披靡！