章子怡飾演的宮二武功高強，由原本純為與梁朝偉切磋功夫，到後來暗戀對方，有打戲又有感情線，戲分極重！
真面目
拍完未 《一代宗師》磨足 10年 章子怡坐正犧牲宋慧喬
由 02年籌備到開鏡到埋尾，足足搞成 10年的《一代宗師》，上映日期一改再改，終於鐵定下年 1月 10日在港上畫。
導演王家衞一向慢工出細貨，不過皇帝唔急太監急，除了御用男主角梁朝偉毫無怨言，完全配合王導步伐，其他如章子怡及宋慧喬都狂呻好難捱，更有傳宋慧喬嫌等得太耐，寧願劈炮罷拍，幾經交涉後只肯度幾個月檔期畀劇組，最終被導演大幅刪減戲分，轉捧章子怡做女一。 嘥兩年變閒角，據知宋慧喬怨氣重，隨時連柏林影展都唔去，唔再 嘥時間！
雖然搞足 10年，但短短幾分鐘預告型爆，又有份做柏林影展開幕電影，慢工果然出細貨。
原於 12月 18日上畫的《一代宗師》，不斷將映期押後，雖然負責發行的銀都機構及負責香港宣傳的 Media Advertising講明電影鐵定明年 1月 10日上畫（內地早兩日），但近日行內有傳《一》仍未剪完片，未必趕得切如期上映，最壞打算要延至 2月先有得睇。
等多過拍
《蘋果日報》圖片
後期製作趕爆，戲中一班演員亦忙於補戲及配音，早前劉嘉玲亦踢爆偉仔仍要為電影做後期，肯定返唔到香港過聖誕，更寸爆王導阻住地球轉。
偉仔身為主角要全力配合，相反來自韓國、飾演葉問太太的宋慧喬卻等到發火，曾一度辭演。「由 09年尾開機到 10年尾，宋慧喬都係等多過拍，雖然劇組喺跑馬地租 咗間屋畀佢住，等佢唔使大陸韓國兩邊飛，但佢等 咗成年都未拍完，其間因為套戲而推 咗好多 job。賺少 咗錢，又要無了期等，宋慧喬曾經發晒爛渣話要返韓國，後尾大家傾掂數，最後拍到 11年 3月先拍晒！」幕後人員透露。
罷去柏林
外援心歸，王家衞惟有靠國產章子怡 孭飛。戲中飾演八卦掌掌門宮二的章子怡，與偉仔及宋慧喬會有曖昧三角戀，而預告片中亦有多場打戲，戲分遠超只得兩個大頭特寫鏡頭、出鏡得 3秒的喬妹。「章子怡上個月仲同人講，話日日都要趕戲，之前又唔見咁趕，佢都有少少埋怨。梗係啦，冇咗喬妹，啲戲加晒落佢度啦！」知情人士說。
對於戲分被刪，宋慧喬透過其中大華區的經理人回應本刊，表示未知拍足咁多年的「大作」，幾時能在家鄉韓國上映，更講明未必畀面去明年 2月的柏林影展。「電影𠵱家進入後期製作階段，出 嚟效果係點，大家都唔清楚，但我都非常期待！套戲成為明年柏林影展開幕電影，我覺得好榮幸，不過暫時未知能否出席，可能到時要拍劇！」原來 5年冇拍劇的喬妹，現在和 8年冇開劇的趙寅成趕拍重頭韓劇《那年冬天，起風了》，仲點會齋等王大導發落？
海報冇影
話晒係第二女主角，點知海報竟然冇宋慧喬，連個名都排到最後「主演第八」，連蔡少芬老公張晉都前過佢，陰功！
3秒過鏡
《一代宗師》的 3分鐘預告中，宋慧喬竟然只得 3個鏡頭，反而章子怡有 16個，仲有對白添！
返歸拍劇
喬妹同趙寅成喺韓國拍緊劇集《那年冬天，起風了》，同聲同氣，好過離鄉別井拍王家衞啦！
悶住練武
雖然宋慧喬以文戲為主，但都要學詠春，據知喬妹等埋位時，都係練武打發時間。《蘋果日報》圖片
隨時 cut走
拍得王家衞就預咗隨時被 cut戲，但一班𡃁模小花依然仆到去拍，好似 Jeana同梁政珏都有幸被取用。但宋慧喬都被刪戲，你兩個咪咁開心住！
Jeana
「我個角色係舞廳小姐，嗰場群戲拍咗幾日，但連埋之前受訓，加埋都成兩個月，但我仲未知幾時首映喎！」
梁政珏
有份客串做歌女嘅梁政珏，懶神秘唔肯講戲分，咁又係，低調啲冇咁𤓓嘛！
章子怡喺開拍前要先訓練 3年，日日拉筋壓腿練柔軟度，連有舞蹈底子嘅佢都痛到大嗌！
失蹤人口
王家衞一向我行我素，除 咗出名慢，亦愛將客串角色 cut走， 嘥大家時間！不過王導已經係國際級名導，演員想出名的話，就算有機會被刪戲都要博一博啦！
關淑怡
《春光乍洩》係關淑怡的處女電影作，可惜王導因片長關係，將關淑怡所有戲分全刪。為安撫對方，王家衞在 99年將刪剪片段收錄在另一齣紀錄片《布宜諾斯艾利斯－攝氏零度》中，更在柏林影展播放。
孫佳君
在《花樣年華》飾演梁朝偉老婆周太的孫佳君，在電影上映時有聲冇樣得個背脊，當時孫佳君狂呻失望，後來 DVD版收錄了 80分鐘從未曝光片段，孫佳君真身先可以重見天日。
妮歌潔曼
美聯社圖片
王家衞 04年公布會搵妮歌潔曼在電影《上海來的女人》做女主角，可惜搞足 3年、直到妮歌生埋女都未開得成，最後妮歌決定唔接拍專心湊女，電影亦胎死腹中冇再拍。 
留言列表
