睇 apps知道巴士幾時埋站，更易預算出門時間。

CLOSE-UP

智省時

2012年12月20日 ~~ 第1189期香港《壹周刊》

隨住 smartphone普及，手機已經唔單只用嚟打電話、 WhatsApp，日常大大小小生活事情，幾乎全部可以靠手機代辦。
只要配合適當嘅智能 apps，搭車、買衫、買傢俬，甚至訂枱食飯，喺手機芒上篤幾下就掂，識得用，絕對可以慳番唔少時間。

行

唔想等車等到𤷪，即時預覽巴士或的士位置， last minutes先至行去車站搭車，慳時慳腳骨力。

轉乘巴士

搭巴士如果冇車直接去到目的地，淨係搵車轉都有排煩。「香港巴士通」可以睇勻全港所有巴士路線，輸入起點同目的地，自動幫你計算點轉車最快同最平，唔知附近邊度有站，仲會話埋你知，認真好幫手。
香港巴士通
對應： Android（免費）

如果唔知附近有邊條巴士路線經過，系統一樣幫到手。

追蹤的士

股市樓市旺，喺街真係好難截到的士。裝番個「的士 GO」 app，除咗可以睇到附近邊度有「吉車」，仲可以打埋電話俾的士大佬叫車，落雨同繁忙時間就最有用。
的士 GO
對應： iOS、 Android（免費）

可連接地圖，睇吓的士去到邊。

幾時埋站

顯示巴士仲有幾耐先埋站，其實唔係新嘢，日本、台灣巴士營運公司一早有類似服務提供，原理只係喺巴士上安裝定位器，系統偵測到巴士實時位置，再按路程估計埋站時間，等市民唔使喺站頭等餐死。香港城巴終於追落後，今個星期喺自家手機 app加入巴士位置追蹤功能，可以睇到六條機場路線巴士埋站時間，包括 A10、 A11、 A12、 A21、 A22同 A29。
新巴城巴
對應： iOS、 Android（免費）

細心睇，城巴新版本 app睇實景巴士站版面，右下角多了個手錶 icon，即代表顯示埋站時間（紅圈）。

顯示未來 45分鐘內會埋站的巴士，而實際測試，巴士的確準時出現。

食

一機在手，即可以遙距 book枱食飯，搵食更易。

用手機 app幫手 book枱、拎籌等位，又可以即刻搵到抵食酒店自助餐，做乜仲要特登走去食肆門口排隊？

攞籌助手

唔少食肆都開始炮製自家 app俾客人 book枱或攞籌，其中以元氣壽司新出嘅 app比較完善，用家只可以攞到附近店鋪嘅籌，減少「亂槍打鳥」嘅攞籌人數；而且爭十個籌就到自己嗰陣，系統仲會打電話通知客人，唔怕過籌，可以放心喺附近 shopping。
元氣壽司
對應： iOS、 Android（免費）

一睇就知依家排籌排到幾多號，差不多叫到時先返去門口等。

沙田搵食

元氣搞自家攞籌 app，沙田新城市廣場就為場內食肆打造專用攞籌 app，可以一次過拎定幾間食肆嘅籌，邊間有位先就去邊間。不過，人人都撳幾張籌，條龍咪有好多鬼籌？
新城市廣場
對應： iOS、 Android（免費）

一次過拎幾間食肆嘅籌，邊間就快有枱，一目了然。

即興自助

比較有水準嘅酒店自助餐，通常都要早兩、三個禮拜 book枱。心血來潮想食，「撲枱」 app或者可以幫到手。每日晏晝四點準時列出十幾間酒店嘅即晚名額，就連網上好評嘅萬麗海景酒店同埋萬怡酒店都有得訂，加加埋埋幾十個名額，鬥快搶枱。
撲枱
對應： iOS（免費）

平至百幾蚊嘅酒店自助餐，好多時幾分鐘就滿額，手快有。

其他

衣食住行之外，手機 apps仲可以幫手繳費、搵醫生，全能助手。

幾時起飛

交通工具嚟講，無論搭飛機抑或接機，班機正常還好，唔 check清楚有冇 delay就出門口，隨時後悔莫及。「香港航班資訊」 app有齊未來兩日所有離港同抵港航班資料，內置埋提示功能，將目標航班加入監察名單之內，當班機有乜改動都會即時通知你。 iOS用家就可以用「香港國際機場」 app，功能差唔多。

香港航班資訊
對應： Android（免費）

香港國際機場航班資訊
對應： iOS（免費）