冇旋轉樓梯，最開心應該係女士，就算著短裙，上落樓都唔易走光。

IGOSSIP

Apple新店攣變直

2012年12月20日 ~~ 第1189期 香港《壹周刊》

Apple CEO Tim Cook今個月初話會將部分 Mac嘅生產線搬返美國，創造本土職位。呢頭講完，估唔到咁快就有第一批「 Made In USA」產品喇，不過，講緊嘅唔係 iMac或 MacBook，而係上星期香港第三間 Apple Store開幕送嘅紀念 tee，之前又一城嗰件都冇講明產地，今次大大隻字印住，唔通真係為咗顯示決心？


今次希慎 Apple Store送嘅 tee印住「 Made In USA」，比起 ifc嗰件同樣美國製紅色 tee，字體更大更搶眼。

講番希慎廣場呢間 Apple Store，鋪頭面積係三間鋪之中最大，足足有三層咁多，亦係唯一喺鋪內裝咗透明 lift嘅鋪；不過貫穿三層嘅樓梯就由攣拗番直，雖然都係玻璃製，但 iconic旋轉設計就變番直梯，感覺上平淡咗啲。 

iPhone 5一國兩制

包裝盒耳機位下面特別整多個位放轉插（紅箭嘴），可以駁 micro USB火牛叉電。（威鋒網）

香港 Apple Store上星期六開幕， iPhone 5亦正式喺上星期五入內地開售。雖則話內地唔多夠貨，加上 16GB定價人民幣 5,288（約港幣$6,560），睇落仲有成千蚊水位，不過，香港回收價已貼近新機價，一來除咗因為香港貨源極多，上 Apple Store訂機兩至四日就送到，收機佬唔使俾錢你賺；二來內地嘅 iPhone 5有特別嘢送，就係一個價值二百幾蚊港幣嘅 Lightning轉 micro USB插頭，等用家唔使一定靠跟機 Lightning線叉電，認真溫馨，難怪根本冇成千銀水位咁多。至於香港行貨會唔會都有得送？唔好意思， Apple方面回覆話冇，即係用家唔想返工或出街後斷電，麻煩袋住條跟機 Lightning線或俾錢買多條啦！明嘅，一國兩制吖嘛。 

強化 Gmail app

更新完 Facebook之後，杜汶澤鬧爆中文介面自動變咗簡體字！最後要將手機語言改番做「中文（台灣）」先有番繁體，離晒譜。

上星期好多 apps有更新，首先 Facebook卒之為 Android推出更新版，睇 post睇相爽夾快； Google Maps亦喺 iOS重生，多咗 turn by turn導航，最緊要夠準，搞到 iOS用家瘋狂喺 Facebook洗版慶祝。
其實 Google同期為 Android強化咗 Gmail app，雖然回響細，但新增兩個好用功能一樣值得推介。兩個新功能都要入「設定」先揀到，唔知就真係走寶。首先喺 email頁面，預設咗只要 㩒住 email向橫一掃，就可以封存電郵，但其實可以 set成 delete，方法係入「設定」→「一般設定」→「滑動會話群組清單」裡面揀。另一樣係睇 email嗰陣可以放大縮細相同文字，同樣係入「一般設定」，剔選「自動調整郵件」就掂，以後睇 email或清理 mailbox就易好多啦！ 

text：周群雄、林勇