本月初,陳倩揚同老公,抱住囝囝,與八十多位家長到名校樂基幼兒圈排隊面試。

探熱針

補你大 雙非多要爭位 陳倩揚為歲半兒報十名校

2012年12月20日 ~~ 第1189期 香港《壹周刊》

雖然怪獸家長一街都係!但一班新鮮父母亦有巧妙方法,培訓下一代。如有個博士老公的陳倩揚,為仔仔一口氣報讀十間名校,並自度一套玩樂課程,唔使催谷,一樣刺激兒子思維。至於蕭定一及危機應變力強的陳浩民老婆蔣麗莎,則另有一套啟發孩子自行學習的攻略。初步結果,陳倩揚的歲半囝囝好奇心重,鍾意研究;蕭定一的半歲 B女唔使逼,每天自動波咪圖書;一歲浩民女更加可以用上四種語言唱兒歌。




陳倩揚的 facebook,放了兒子模仿她彈琴的短片,她說讓兒子從旁觀察,可啟發他自學興趣。


歲半已經係每事問的 Auryn,排隊時拉住媽咪到處探索。

博士老豆真傳


在中大日本研究學系畢業的陳倩揚,老公是美國密歇根州立大學博士生,做科研搞綠色科技;一屋讀書人,陳倩揚早已為歲半兒 Auryn(陳羲廷)鋪排博士路,除自度一套玩樂吸收法,據知她一口氣為兒子報了十間包括九龍塘及火炭的樂基幼兒園、大埔安基司、 Box Hill( HK International)(博士山)及 St.Catherine's等名校。
今個月初,陳倩揚偕同老公,帶住囝囝晨早八點半到火炭的樂基幼兒園排隊面試。雖然要面對大量雙非童爭學位,但陳倩揚兩公婆神情輕鬆,不似其他父母如臨大敵;活潑的 Auryn捉住媽咪周圍走,每事問,陳倩揚亦不厭其煩,耐性地逐一解答。
面試一小時,有家長爆料,指 Auryn攞住個玩具研究,深得博士老豆遺傳基因。「陳倩揚個仔好主動,面試嗰陣模仿老師講 嘢,又好專注咁攞住玩具研究點玩。現場好多老師讚佢,連校長都行埋去同陳倩揚傾偈。」知情者說。
囝囝面試表現出色,陳倩揚即時放下心頭大石,之後一家三口到附近醫肚,小 Auryn已懂自行進食,陳倩揚果然教子有方。


她找來導師為兒子設計一套課程,邊運動或玩泥沙邊學英語,令他樂趣無窮。


之後去食飯,陳倩揚兒子已懂自行拿着匙羮進食,偶爾才讓媽咪幫手。




有關為兒子報讀十間學校,陳倩揚回應說:「幾多間就唔講啦,總之係想幫個仔搵到好學校,我住粉嶺,要同雙非童爭學位,報多幾間會保險啲。」陳倩揚更強調自己教仔宗旨不在於催谷,而是採取遊戲方式,刺激囝囝思維。
「我同老公都覺得小朋友應該從遊戲中學習,所以我請咗個導師,因應個仔 嘅興趣,例如游水甚至玩滑梯,用遊戲加運動,訓練佢 嘅肌肉協調,同時用英語教佢生活用詞,所以上堂地方唔係泳池就係 playground!個仔唔會覺得自己上緊堂,咁樣反而會增強佢對學習嘅記憶。平時我同佢玩,唔會即刻教佢點玩個玩具,先放手俾佢自己摸一輪先,培養佢自行學習 嘅興趣同自信。」

愛咪書似阿爺


蕭定一女兒蕭熵芷( Souleah)跟爺爺蕭若元、 IQ差不多一百四十的姑姐蕭瑤瑤一樣,鍾意文字書,半歲人仔揀書睇唔揀玩具,蕭定一老婆 Michelle也認同女兒性格似足蕭家,對媽咪在台灣買回來的黑白版幼兒書,愛不釋手。
明年一月, Souleah會入讀專為半歲到一歲而設,十二堂五千有找,由日本人七田真創辦的 Shichida playgroup班,圈中名人二代如李嘉欣兒子 Jayden、李克勤的兩個仔,都曾經上過堂。
「我唔係怪獸媽咪,之前做過資料搜集先揀呢間學校,主要係用音樂同做 gym,刺激 BB大腦,我個女鍾意睇書,學校會用圖片、文字啟發小朋友腦部發展。不過如果 Souleah唔鍾意,我會幫佢退學,總之唔 push佢。」蕭定一老婆說。


狂咪書
蕭定一愛女,半歲已經被父親培育成書迷,整天愛咪書。




六個月大開始出牙,成日搵嘢咬的 Souleah揸住奶粉罐唔係要嚟咬,而係睇罐上嘅文字。


Michelle在台灣買返嚟的黑白版幼兒書,主要認識圖案及玩視覺遊戲。

四種語言同步


陳浩民長時間在內地開工,安排女兒讀書全交老婆蔣麗莎負責。七個月前已開始報讀學前班,剛滿一歲的雅薷現在每逢星期五到中環返 playgroup,一堂個半鐘,四十五分鐘學普通話,四十五分鐘學英文,返到屋企,媽咪更用埋意大利文及廣東話跟女兒溝通。
「我 喺意大利生活過六年,教雅薷講 嘢,好似數目字,我會先用意大利文,再用普通話、廣東話,最後用英文,等佢早 啲接觸唔同語言。返 playgroup主要係可以學習適應同人相處,佢而家已經會主動同其他小朋友分享。」蔣麗莎說。


浩民太每逢星期五抱住雅薷到多多 playgroup上堂,上週五因開聖誕派對,所以毋須著校服。


多多 playgroup學費五千元,每個月四堂,即一堂千多元,一啲都唔平。


一歲學童,已經要孭書包,帶書上堂,絕對認真。

撰文、攝影:娛樂組

arrow
arrow
    全站熱搜

    tvb4life 發表在 痞客邦 留言(0) 人氣()