鄭伊健 夢想 腦力打機
喺演藝界搵打機精，第一時間諗起鄭伊健，今年亞洲遊戲展AGS終於搵來呢個代表人物做代言人。問他期待未來遊戲機有乜突破，竟然希望以「腦力」打機，而由細打機打到大嘅佢，更可謂親身見證遊戲機歷史，對打機絕對係「一生愛你一個」！
記者：韓繼聰 攝影：劉永發
期望「聲」「腦」打機
伊健愛打機好多人都知，佢更話原來一頭標誌性長髮，係由當年扮「街霸」阿Ken開始，他與打機極有淵緣，代言AGS對佢嚟講簡直係寓工作於娛樂。對於未來遊戲機發展，伊健就有個特別諗法：「我期望用『腦力』打機，其實家都有啲類似嘅小遊戲，用腦電波直接控制，手唔使郁，戴個頭盔就玩，幾過癮！」佢更想到用聲唔用畫打機，「即係好似玩戰機Game咁，用聲來分辨敵人、飛彈遠近及位置，應該會幾有趣。」打咗咁多年機，見解果然獨到。佢更覺得未來打機應該更加與生活融合，可以從手機及手表連接遊戲，同生活互動，「其實已經有Game做緊，只係唔夠全面，試諗吓行街都可以當係Game裏面嘅升級訓練，幾好玩呀！」
■伊健話女友鍾意玩「儲嘢」Game，所以好少一齊打機。 
■同小朋友一齊打機，十足一個大細路。 親身見證打機史
問到伊健嘅打機史，佢即刻如數家珍一樣，智慧星、阿達利、樂家……一堆唔係人人聽過嘅史前遊戲機名琅琅上口，「一開始嘅遊戲好簡單，可能只係兩邊將粒珠對撞，已經可以玩足成日。」據佢講，佢真係差唔多玩齊歷來嘅遊戲機，乜奇形怪狀機都有，「以前甚至有用Cassette帶及LD嚟玩嘅遊戲機，而我其中一部覺得最經典嘅就係PC Engine，因為當年它好似係第一部可以用光碟打嘅機，好有型！」
■PC Engine是伊健心目中嘅經典遊戲機。 
■呢部就係伊健所講，類似兩邊將粒珠對撞嘅遊戲。 
■當伊健一打機，立即進入專注狀態。 極迷《Dead Space》
問伊健最愛打甚麼類型嘅Game，原來唔係「頭搖又尾擺」嘅賽車，亦唔係「雲上舞，風裏刀」嘅格鬥，而係恐怖冒險射擊遊戲，《Dead Space》系列更係佢嘅最愛，「呢隻Game啲氣氛真係好勁，比睇戲更投入更驚，真係會玩到嚇到彈起，家都好期待下年推出新一集。」
自言連睇戲都特別鍾情恐怖片嘅佢，《生化6》當然亦走唔出佢手指罅，「近排最迷《生化6》，不過因為工作，暫時只完成咗Leon嗰部份咋！」而伊健更欣賞遊戲入面嘅本地元素，令佢玩得特別過癮，「見到啲香港景真係好真好靚，我甚至會專登Pause咗睇景兼研究吓，我懷疑有一部份應係土瓜灣嘅其中一條街。」各位打緊《生化6》嘅話，不妨吓係唔係。
■《Dead Space》恐怖氣氛一流，是伊健最愛，他極期待下年推出的新一集。 
■《生化6》入面嘅香港場景，為伊健增加不少打機樂趣。
■因為工作關係，《生化6》暫時只玩咗一部份。 
■《Alone in the Dark》可謂恐怖Game始祖，伊健當然有玩過。
留言列表
