朝早得十九度仲要下毛毛雨，山頂大霧到伸手不見五指，一班狗主拖實隻狗怕走失。

寵物家

暴風雨濕行山頂

2012年11月29日 ~~ 第1186期 香港《壹周刊》

香港救狗之家（ Hong Kong Dog Rescue）今年特別運滯。每年 11月份舉辦的人狗步行籌款日，連續八屆都是陽光普照萬里無雲，偏偏今年天氣異常，十一月底都陰雨連綿，到 11月 26日出發的早上，更是大風大雨，主人與狗既要擔遮、披雨褸，又要換水鞋，極盡狼狽。
今年救狗之家獲得迪士尼冠名贊助，目標籌款百萬元，但天雨影響，到活動當日只籌得七十餘萬，好彩有迪士尼再捐款十萬，夾夾埋埋幾近達標。慈善步行更有過千名狗主冒雨支持，而且過程爆笑、蝦碌花絮更多，真係好心有好報，咁多善心狗主，辛苦晒！

預備花絮

雪橇狗戰鬥格
大風雨到，明明落雪都唔怕的雪橇狗，都要著番件雨褸！


花車出巡
雖然天氣欠佳，仍有狗主花心思幫愛犬扮靚靚，別以為無人欣賞，不知幾多人主動埋身要求合照，攞晒彩。

著情侶裝

步行籌款票價二百元，包一件迪士尼限量版 T恤，好多主人特登買多件俾狗仔著，好似 Karen與所養的混種唐狗 Nikki（圖左）就著到成對孖公仔咁。原來 Nikki當年也是棄狗，只差四天便要被人道毀滅，幸好救狗之家將牠接走，之後被 Karen領養。 

高齡婆婆撐場

八十四歲的潘婆婆也帶狗參與，她和女兒一年前到救狗之家領養西施犬 Coffee，她盛讚該會義工會調查領養者需要，又替狗仔做健康檢查，令領養者好放心。 

蘭桂坊終點

終點設有多個慈善攤位，有救狗之家的領養活動、狗糧義賣、寵物傳心術示範、訓犬師講解等等，讓一眾勞苦功高的狗主盡興而回。 

九曲十三彎

步行起點在山頂廣場，終點是中環蘭桂坊。路線全長 3.2公里，途中路程迂迴，又多長命斜，加上天雨路滑，好多狗主行吓又停吓。雖然艱難，但為慈善，狗主們都堅持完成全部路程。 

救狗一命

待領狗隻有臘腸犬、八哥、積羅素等等，歡迎有心人到鴨脷洲中心探訪牠們，更可選擇助養，每月五百元起。

救狗之家於 05年成為政府認可非牟利慈善團體（編號#91/7544），目的為拯救於漁農自然護理署狗房面臨死亡邊緣的狗隻。團體成立以來救過數以萬計被遺棄的狗隻，並為牠們進行治療及尋找新家庭。該會有多名資深訓犬師擔任義工，協助領養人士處理狗隻行為問題，及教授養狗知識。
救狗之家屬全自資模式，營運經費全靠募捐。有心人可透過助養狗隻、擔任義工和捐贈寵物用品來支持團體。

救狗之家領養及零售中心
地址：鴨脷洲大街 21號地下
電話： 3480 0061
開放時間： 10am-6pm
網址： http://www.hongkongdogrescue.com 

撰文：鄭鳳
攝影：陳家維