回顧過去，總讓人有無限感慨。

對祥嫂洪金梅來說，往事更是難以忘懷，特別是1997年祥哥逝世後，與四名子女鄧兆尊、鄧兆榮、鄧翠玉（小艾）和鄧碧玉爆發的爭奪祥哥估計約值四億遺產的風波，就更是記憶猶新。

祥嫂接受本刊獨家專訪，大談當年與祥哥的生活點滴，與子女爆發爭產官司的緣由，更談到十多年後，最終與子女們真正和解的過程。

「但我自問冇做錯，錯就錯在錢為萬惡、錯在剩得多。」祥嫂說。

直到2010年，即家變十三年後，鄧氏一家人在小艾的努力下，最終都能冰釋前嫌和好如初，如今眾人都珍惜一家人齊齊整整，享受天倫樂的美好日子。

「仔大仔世界，雨過天青了，前事不計，大家一家人血濃於水，至今我都無怨無悔，以身為祥嫂為榮。」祥嫂慈祥地笑着說。

訪問當天小艾陪母親一同現身，恍如經理人。不過祥嫂手中的冷頸巾，卻是小艾以15分鐘織出來的。「我阿媽都唔識織冷衫嘅！」小艾笑說。

淚憶祥哥

祥嫂接受訪問時，雖然祥哥逝世已十五年，但每當說起祥哥生前種種，即潸然淚下難以自制，皆因兩人相處數十載，從前種種皆歷歷在目。想當年祥嫂負責管理整個戲班的事，所有財政人事，以至幫祥哥化妝都是祥嫂一手包辦的。

「當年祥哥次次化妝時都會鬧我，要我化得快些，愈多人愈鬧得起勁，但事後又會o氹番我。我做人座右銘就是力去力回，自己不落手落腳的話，就不會好，做人不要怕辛苦，付出就一定有回報，至少我都做到家興業旺。」

不過，最讓祥嫂感觸的，還是每次路經永祥大廈時的感慨。

「五、六年前，當時一個人住陽明山莊，每次出入都一定會經過永祥大廈，觸景傷情，個人真係好唔開心，好多回憶、回想，試過一次自己揸車行過，一剎那好悲哀，差一點發生撞欄交通意外，我知道自己仲係唔甘心亦唔捨得。」

祥嫂近年和邱亞葵合作，推出祥哥作品集CD和DVD。「我希望推廣祥哥的藝術經典，等識欣賞的人可以珍藏。」

在永祥大廈生活了幾十年，感情自然難以割捨。

「一直以來都係一個大家庭，我一個人照顧祥哥同幾個仔女，所以我好嬲自己，點解一個大好家庭會畀自己搞成咁。孤清清一個人，愈來愈煩惱，好寂寞，但係所有事都既成事實，點都要自己開解自己。當時真係感覺好孤獨、好感傷！」

祥嫂說當年常常想，祥哥年事已高，要為自己同仔女打算，所以對某些事情看得太緊張，致有後來的爭產風波。就算到了現在，每次經過永祥大廈，或是說起祥哥往事，祥嫂還是忍不了淚水。

祥嫂家中養了十多頭愛犬，全部人咁大隻，拍攝時群情洶湧，連攝影師都有點驚。不過祥嫂說：「唔使怕，好乖o架！」

大宅中最當眼處，就是祥哥祥嫂的婚紗照，祥嫂打趣說：「有人敢追我，一入門口見到張相都嚇到走啦！」