何小姐(圖)租下的公屋單位,實用率近八成,方正的客廳放有少數傢具,若不嫌棄殘舊,寬敞度比私樓更甚。(于港民攝)

財經坦白講

癲價租樓記

2012年11月29日 ~~ 第1186期 香港《壹周刊》

你會出幾多錢,租一個廿幾年樓齡的舊公屋單位?何小姐出了一萬元月租,租下一個已達二十四年樓齡、面積只有四百多呎的寶林邨單位,創造了公屋界神話。這個租金,較私樓日出康城更貴,各大報章紛紛報導。本刊找到這位租戶,她對於成為街坊街里的新聞人物,言談間流露「寃屈」:「我搵咗五個月都租唔到樓,鬼叫我急咩,個市係亂谷上去㗎!」

報紙話,呢個係癲價成交;多得佢哋登出來啦,我哋啱啱搬來嗰陣,樓下看更同茶樓啲人猛問我細佬:「你哋新搬嚟?知唔知呢度竟然有人用一萬蚊租公屋呀?」我哋不知幾尷尬,點敢認!
唉,有時間慢慢搵的話,你估我會揀呢度?間屋實用面積得三百幾呎,一眼睇晒,用薄牆間得一間房,仲要乜傢俬都無,業主髹白幅牆就話有裝修!間屋係俾阿爸阿媽住,佢哋無話唔慣,但我好激氣;呢啲叫生不逢時,唔好彩,撞啱個個唔敢買貴樓轉晒租樓,租金推高晒。我哋呢啲真係有需要嘅,只能硬食。
我搵租盤,大大話話已搵咗五個月;阿爸阿媽已經八十幾歲,原本同細佬租住荃灣居屋,為咗同我方便照應,決定十一月租約滿就搬來將軍澳。早喺六月,我哋已開始搵地產經紀睇樓,私樓梗係最好,有會所,可以活動吓,但經紀話:「小姐,一萬銀搵兩房、又要私樓,好唔現實喎!」我唔信,但兩個月無回音,我見唔對路開始搵細行,例如鴻運、廿一世紀幫手。


何小姐家人搬入寶林邨當日,各大報章紛紛大字標題報導這宗萬元承租公屋個案。他們不時被街坊問及:「你新搬入嚟?知唔知有一萬蚊租戶單新聞呀?」(歐陽江攝)


屋內裝潢簡陋,只髹白了牆身及鋪設地磚。單位用薄板間有一個房間,但房內沒有窗戶,僅在頂部留有通風位。

天價即變市價


不過呢個市,根本就掉一個盤出嚟,就即刻有人租。我哋唯有加多少少錢;千等萬等,再過一個月,先睇到一個新都城兩房單位,開價一萬二千八百蚊,一睇就想租,但經紀話:「有會計師都傾緊想租喎,不如你出一萬三千五百,當俾啲誠意囉!」我哋都無所謂,點知等極無回音。唉,俾着我都租俾專業人士啦!後來居屋欣明苑、浩明苑都睇咗,都係租唔成。
話咁快又十月。經紀打嚟,話寶林邨有個一房單位,開價九千五百蚊。去到咁,唯有安慰自己,公屋始終都實用嘅,退而求其次囉,一房都 OK啦。我仲問經紀,可唔可以還價幾百到一千?業主唔肯,仲要我請假帶阿媽去見佢。我心諗,有冇搞錯,相親咩!業主見係老人家住,即晚回覆租咗俾第二個。我已經落咗細訂㗎喇!話租又唔租,就係咁無良!
最後得番一星期,急到不得了!有間月租一萬三千五百嘅南豐廣場兩房單位,我諗住照租,點知加多五百業主都係唔租。喺極度沮喪下,另一個經紀打嚟,問我哋考唔考慮公屋?原來就係之前話已租出嘅寶林邨單位,開價一萬蚊。即係半個月唔夠,業主就加多五百。公屋一萬?唔係啩!但鬼叫我哋急,梗係照租,但求有瓦遮頭。而家係你(業主)願打,我(租客)捱打,覺得唔抵又點?間間經紀行都將份報導貼晒出嚟,於是天價就變晒市價,個市就係咁谷出嚟!你話喺香港做窮人幾慘吖,搵三萬蚊都唔夠養兒育女!


大廈屬舊式的新長形設計,走廊僅得微弱的燈光照明,非常昏暗。業主將原有的黃色鐵閘換上鋼閘,私隱度較高。


單位內的廚房與廁所只有一牆之隔,設備簡陋,但間隔寬敞。

唯有安慰自己,我哋細細個開始,住公屋都十幾年啦。呢度街坊好守望相助,有事可以照應,喺公園散步都會傾吓偈,好過住居屋,無聲無氣,人情味又少!我哋一年死約完咗住邊?到時睇吓個市點,見步行步啦!

要租樓 睇中即日搶


何小姐租下的單位,原業主於今年六月,才以一百六十七萬元買入,今次一萬元租出,回報達七點二釐,冠絕私樓;現時同屋苑放盤,最平都要二百五十萬。而租金亦因天價成交拉高至一萬元樓上,但罕有放盤,成交極少。
行內人士指,現時將軍澳區租盤極少,租金愈推愈貴,租盤一放都至少有三、四枱準租客供業主慢慢揀。例如寶林邨旁的私樓新都城,雖然聲稱有九十個兩房放租盤,但「 firm租」的只有三個;將軍澳中心亦僅有三個,南豐廣場更只有兩個,租金都要萬三蚊以上。有心租樓人士,睇樓時可帶同入息證明文件或稅單,即時供業主查閱,證明自己有一定經濟能力,增加其信心。而睇中就要即日扑槌,不能慢慢諗,愈快決定愈好。 

撰文:郭曉琳
攝影:關永浩
資料:黃詠茵

arrow
arrow
    全站熱搜

    tvb4life 發表在 痞客邦 留言(0) 人氣()