單人訪
吳家有喜 吳君祥
今次的專訪人物叫吳君祥，夏春秋兒子，吳君如弟弟，江美儀男友。他剛成立了娛樂製作公司，準備拍微電影、搞網上電視，還簽了網上人氣蒙面歌手龍小菌。
為甚麼要做他？因為我從未遇過這樣有趣的一家。兒子搞生意，老爸與老媽立刻推掉至愛的麻雀局，打扮神氣前來撐場。冬叔冬嬸拿着我們特製的搞鬼版《忽然 1周》，醒目地交戲配合。那邊廂的江美儀，之前一日更帶愛犬 Teddy去洗澡修甲，比自己做訪問更緊張。我相信假如吳君如或陳可辛有空，說不定也會出現。
一個人創業，闔家支持，你寸下我，我潤下你，歡樂無比。
「我冇乜願望，如果真係要講一個，希望大家都開開心心。」吳君祥說。
專訪需要新鮮感，更需要正能量，這就是原因。
江美儀：佢 EQ好高
《名媛望族》裏的江美儀是三太太，現實裏的她絕對是大婆。她的辦公室跟男友的辦公室只是一板之隔，製作公司她真金白銀拿錢出來投資，叫她一聲「老闆娘」，絕對受得起。
「公司主要拍微電影，及捧龍小菌同我囉！」江美儀說。
與吳君祥拍拖七年，像相處了一世。
「我同吳家好有緣。首先，我同冬叔係同月同日生，每年 9月 20日都一齊慶祝。我跟 Vincent（吳君祥）同佢細佬係讀同一間小學，想當年我唔太認識吳君祥，我係暗戀佢細佬！仲有，有日 Vincent突然大嗌：『 BB你睇下，你身份證最後三個字 221係我出生日期呀！』咁多巧合，你話係咪好勁？」她大笑。
江美儀喚男友做 BB，吳君祥也喚女友做 BB，一對四十多歲戀人，就這樣 BB來 BB往。初聽會覺得很肉麻，但久而久之你會明白這是他們的性格——事無不可對人言。
「七年前我哋在一個場合上再遇，我第一句就同佢講：『你知唔知我當年係暗戀你細佬？』佢答我：『太遲啦，我細佬已經結咗婚！』之後我哋便開始交往。佢主要用 SMS追我， send下 send下就撻着咗，係咪呀 BB？」
在旁的吳君祥沒好氣：「仲好講，我當時在美國，都唔知嘥咗我幾多 Long D錢。」
吳君祥在家中排行第二，上有家姐，下有弟弟。有次冬嬸無意拿起家裏的電話分機，聽見兒子正在跟剛剛撻着的江美儀談心，嚇得魂飛魄散。
「我當時未戒煙，把聲好沙，媽咪以為個仔同個男人傾偈，以為佢轉咗性取向！」
江美儀爽朗豪邁，吳君祥斯文陰柔，兩人不但沒有火星撞地球，反而像一凹一凸的齒輪一樣。
「我性格急躁，佢就似食咗成擔豬油糕咁。佢極度貪靚，衫褲鞋襪要襯成一套，每次出街都遲到，搞到我都遲埋，好鬼忟。現在出門口前我會預留十五分鐘佢：『行得未呀 BB？』雖然佢為人『懦』，但 EQ極高，分析能力又強，正好中和我這方面不足。每當我工作上遇到難題，佢總會為我分析同解決。」
兩人感情穩定，但就是未想過結婚。
吳君祥與江美儀的製作公司叫「黃金時代」，八月成立，龍小菌是旗下歌手。
「有需要嗎？我哋已一齊住，生活跟兩公婆無分別，毋須執着一紙婚書。我覺得一男一女要行到最後其實好難，感情能夠 keep到當然最好，中途其中一方要離開也無所謂。將來嘅事無人知，現階段佢係我想行到老嘅伴侶。生仔更加唔會諗，即使佢家姐個女，佢都唔會主動同佢玩，佢唔鍾意細路仔。」
現在一起創業，已是兩人的結晶品。
「係！同朋友合夥始終有風險，只要其中一個理念唔同，生意就好難做落去。我哋兩個互相信任，又有默契，唔需要盤算對方。」
江美儀八面玲瓏，她強在知道甚麼時候不逞強。
「在公司我只會提點佢，佢始終係男人，永遠係最後做決定嗰個，否則員工不知道應聽邊個講。」
夏春秋：佢叫阿媽換咗個老竇！
去年到意大利旅行，同行的還有江美儀父母，早已是一家人。
江美儀說過，吳家最好笑的人其實是夏春秋，子女的幽默感皆遺傳自父親。今天所見，此言非虛，冬叔絕對是冷面笑匠。
「我份人好民主，仔女點發展由得佢哋，唔好麻煩到老竇就得喇，如有好處俾番老竇更好㖭啦！依家生活主要係打麻雀，仲有同未死得嗰啲朋友飲茶。做人最緊要開心，所以弔喪問病永不去，你死你事。拍戲也只會拍喜劇，一定唔拍悲劇，你喊十次我又陪你 NG十次，咁就闔家祥啦！」
說罷哄堂大笑。夏春秋又名冬叔，原名吳錦泉，行年八十一，依然聲如洪鐘，身壯力健。他五十年代加入亞視前身麗的呼聲，也拍過粵語片。最為人熟悉的，是做了十八年六合彩攪珠主持。女兒早已獨當一面，現在輪到兒子大展拳腳，他老懷安慰。
「 Vincent好有表演慾，影相永遠古靈精怪，從來唔會企定定。佢細個都幾百厭，話明油漆未乾，佢就以為自己係大明星，走去打手印。我打佢，佢夠膽死叫阿媽換咗個老竇！」
冬嬸在旁吃吃地笑，她樣貌完全是個成熟版吳君如，但只會默默聽老公發言，甚少出聲。
冬叔續道：「君如似我，性格火爆，最怕遇見蠢人， cancer有得醫，人蠢無藥醫呀！ Vincent則似佢媽媽，貪靚又滋油。約佢十點，佢十點仲喺屋企梳緊頭！」冬嬸笑得更加開懷。
對於和自己同月同日生的新抱仔，冬叔讚不絕口。
「佢哋交往時，我已覺得美儀呢個女仔唔錯。佢性格爽直，是其是非其非，好識人情世故。結婚？望就咁望，但唔到我話事。只要仔女開心做父母就開心，現階段最緊要俾心機努力工作。」
最後也叫做跟冬嬸說了兩句，她嗓子很小，樣子可愛，眼睛好像永遠在笑。
「都想有多個孫仔，但佢哋鍾意狗仔，唔鍾意細路仔……係呢（反問我），你有無見過龍小菌個樣？我淨係聽過佢唱歌，未見過佢真人……」
想不到冬嬸會反收風，好鬼馬。
吳君祥：我係牙擦仔
吳君祥第一句便自爆自己屬羊，雙魚座，潛台詞是「感性、富創意，兼有藝術天份」。別忘記他是吳君如細佬，兩姐弟的牙擦仔說話方式如出一轍。
「我認我係牙擦仔，但絕對唔係蝦蝦霸霸嘅技安。我鍾意研究八字、命理、風水、星座，一早知道自己條路要點行。」
小學讀軒尼詩道官立小學，中學讀維多利亞工業中學。他愛把校服褲改成超級窄腳褲，小息打波出了汗，他索性到男廁洗個頭；上歷史課講到曹操，他舉手搶答：「曹操好型，佢好奸但有好多 friends……」他極富幽默感，永遠是班中的亮點，老師對他又愛又恨。
「我只係比較注重儀容，同埋鍾意搞下 gag咁啫！我自細已好有表演慾，自問唱歌幾好聽，但奈何唔夠靚仔，又唔甘心做醜角或二線。你試下俾劉德華或金城武個樣我吖，我一定入行拍戲。」
十六歲去多倫多留學，大學在 DeVry Institute of Technology讀電子工程，也讀過短期的電影製作課程。畢業後真的做了跟電有關的工作——賣大哥大電話。
「四千幾蚊加紙一部『水壺』，利潤有 20%。最好賺係做咗電訊公司代理，我嘅銷售量全加拿大排第三，電訊公司請我去加勒比海旅行。」
九十年代初他已賺了第一桶金，生意越做越大。後來涉獵汽車買賣生意，全盛時廠房面積五萬呎。他自己開輛保時捷，出入上流社會，多倫多的華人都叫他「吳公子」。
「年少氣盛，自己嗰時都真係幾寸。」
兩姊弟年齡只差年半，感情要好。小時候看見家姐在銀幕上飾醜角，吳君祥說：「每個人都應該有自己定位，佢咁做絕對正確，家姐好叻，我好佩服佢。」
他在彼邦的中文電台做主持，偶爾打給香港的家姐做越洋直播，儼如半個娛樂圈中人。港產片只要出過碟的他都看過，一直有個電影夢。 2001年生意夥伴相繼離場，他決定回港尋夢。住家姐屋企，首先向姐夫探路。
「陳可辛好語重心長咁同我講：『阿祥，香港有百幾個導演，依家有戲開嘅唔超過三十個，你成三十四歲先入行，實餓死！』但我條氣點都唔順，死都要去片場。」
他做過兩集《金雞》的場務，走走趯趯日曬雨淋，吳公子變了阿四，落差好大。
「我識啲命理，計到自己呢十年只係行『捱』運，得個做字，咪索性順應天意囉。反正香港無人識我，若然喺加拿大捱咪仲慘！」
他之後幫商台和電訊盈科拍過宣傳短片，又拍過網劇《百分百感覺》和《男女字典》。 ○三年開始在蘇豪區投資酒吧生意， ○五年開到去銅鑼灣和西貢，全盛時期是七間酒吧的老闆。後來拍檔離開，他全身而退，幾年下來又是得個做字。
「酒吧生意有賺有蝕，打個和，但賺咗好多人生經驗同人際網絡。我勝在 EQ高，無乜嘢可以激嬲我，最惡劣環境下都可以用盡方法令自己開心。」
他屈指一算，十年「捱」運將完，於是與女友成立製作公司，追尋那個未圓的夢。
「其實大方向已好明確，上網找尋娛樂會係未來趨勢。我同美儀好夾，大家可以取長補短，相輔相成。可能由細到大習慣同家姐相處，呢種性格女仔特別吸引我，溫柔體貼嗰啲反而唔鍾意。我係豬油糕呀，佢吹我唔脹！我識分輕重嘅，重要約會一定準時，同屋企人食飯遲少少有乜所謂？你哋咪食住先囉！」
他承認自己貪靚，最愛意大利品牌 Neil Barrett西裝。
「美儀着衫就麻麻喇，只可以用『得意』去形容……」
江美儀在旁大嗌：「梗係啦，我成世人最好眼光就係揀咗 BB你， quota用晒喇！」
但凡經歷過八十年代，必定梳過呢款髮型同做過呢個眼神，年輕人經典 chok樣呀！
客串過《金雞》，做夜總會酒客。《壹週刊》圖片
賣多一萬
其實今次已沒有甚麼篇幅寫後記，但看到這個有趣畫面，不得不記錄下來。話說冬叔很愛我們設計的封面，還用手機拍下來留念。末了他冷不防加一句：「呢個封面咪幾好，如果真係出，我肯定你哋《忽然 1周》賣多一萬書呀！」
係咪㗎？讀者點睇？
下期預告：
撰文：林蕾
攝影：袁家樂
協力：李梓軒
錄像：湯文峯
髮型： Ivan Lee@Headquarters（江美儀）
化妝： Ivan Lee（江美儀）
留言列表
