認真就輸了！今天的周麗淇懂得放下，那怕你說她「反骨」、標籤她「剩女」，甚至無間斷要迫她跟賤男藕斷絲連，一切由得你講，「入娛樂圈EQ要高過IQ，你冷靜定發癲處理件事都有不同效果，處身不同角色都可以雙贏㗎！」活在當下，不用再隨波逐流，「唔拍拖代表孤獨咩？NO，可能我好開心呢！」講得啱，最緊要自我感覺良好。撰文：彭燕燕 攝影：畢紹基
Hair：Debby Kwan of Hair 服裝：Daydream Nation 場地：九龍珀麗酒店
有說蛻變就像死亡，把你從一個層面帶到另一個層面去，別了羅傑承，周麗淇選擇放慢腳步享受生活，還跑到歐洲洗淨心靈，「覺得自己近幾年成長了，遊學是有得着的，以前人生沒有方向，只懂工作，從沒靜下來思考，新公司給予很大自由度，不用再受指令做事，會重點發展大中華巿場，主力拍劇和推出國語碟。」
笑對反骨指控
宣佈轉投林建岳的大岳娛樂公司，跟任賢齊北上掘金，隨即引發「反骨」指控，「係話我骨骼精奇呀，哈哈，一則新聞而已，明眼人都知發生咩事，係唔鍾意被話『反骨』啫，咩反骨？我同邊個反骨？內文完全無提，可能放封面條題要吸引讀者啦，有無人針對我唔知，入娛樂圈EQ要高過IQ，你冷靜定發癲處理件事都有不同效果，因你唔知要面對咩人咩心態，所以要先冷靜，敵人來侵犯你都要知咩原因，可能有些是工作需要，我明白新聞係要吹先有人FOLLOW，唔係邊有話題？所以大家處身不同角色都可以雙贏㗎！」人大了，真的會宏觀處事，看透是非。
大玩愛情三角錯靠TVB入屋，周麗淇食住女警個勢，再接無綫新劇《好心作怪》演便裝女警，與苗僑偉和黃宗澤大玩愛情三角錯，「這是一部集人性和黑色幽默的故事，三角關係好複雜，一個是成熟穩重的三哥苗僑偉，一個是當今少女殺手黃宗澤，故事峰迴路轉，好多事似是而非，其實我覺得好幸福㗎，有兩個人爭你喎，拍戲就是可滿足你現實生活不能發生的事，我又何德何能有兩個人畀我揀？我有選擇恐懼症㗎，萬一揀錯咪慘，寧願你唔好畀我揀，係就係，唔係就唔係！」
好女唔憂嫁
女生三字頭無着落便被標籤為「剩女」，像周麗淇這類搵到錢又有質素的，該標籤為「盛女」，「自問都想有個人可依偎吓，但可遇不可求的，有又未必好，可能煩到日日炸你呢，家姐結婚都有動搖過，自己係咪真係有問題呢，點解連拖都無得拍？唔好問我想要咩，我都唔知，靚仔有錢係大家覺得基本要有的特質，但我着重溝通和感覺囉，又唔覺自己要求太高，唔想因別人影響而話『算啦，粗粗地嫁咗去，起碼都叫嫁過！』，點解做人要隨波逐流？有朋友問我會否跟家姐一樣嫁外國人，我真係唔知呀！未到嗰個Moment真係答唔到，不如搵個黑人或者泰國人試吓！其實工作可以好妥協，感情事都想留給自己處理，坦白講，他日開心又覺得有安全感咪講囉，可能會癲咗咁宣佈結婚呢，哈哈，我唔恨嫁，邊個話長頭髮一定斯文？唔拍拖代表孤獨咩？NO，可能我好開心呢！哈哈！」
留言列表
