一套《巴不得媽媽》,既令華姐出身的岑麗香成為新晉「高登女神」,亦令乸乸哋的「蘇基」古明華大受網民熱捧,更在facebook發起「一like一個撐」,撐他攞今年「飛躍」或「男配角」獎,才幾天便得到了逾六萬個Like,九百多個留言讚賞,四十八歲的古明華也因此人氣爆燈,令他有點不知所措。

就如訪問這天,他應我們的要求以「蘇基」look上陣,在電視城裏所到之處,行家同事不是以很camp的口脗大叫他「基基」,就是直截了當跟他說:「蘇基!撐硬你呀!」更有同事要求與他合照,只見他均以靦腆的笑容來回應:「多謝、多謝!」

個個like個個撐,不過當事人並沒有因此飄飄然,反而更懂得自我提醒。

「我從來冇諗過會咁受歡迎!我自己睇番套劇,仲有好多場口可以好啲。不過拍時,啲幕後同事都話:『嘩!你呢個角色掂硬呀!』但我都係講嗰句:『黐乜鬼線呀?我啲戲,你哋不嬲套套都話掂o架啦!有邊套你哋話唔掂先?』哈哈哈!其實『蘇基』係好多幕後落嘅心機同貢獻,當然唔可以唔多謝監製德哥(潘嘉德)夠膽用我啦!唔係佢,我就唔會有咁多人支持,亦都唔會感受到,呢份迷惘有幾咁美妙!不過,講難聽啲,呢啲都可能只係過眼雲煙啫。」說罷,他尷尬地笑。

See,這就是現實中的「蘇基」!

 

這十八年

拍過照後,古明華極速卸下「蘇基」look,眼前的他跟五分鐘前落差很大,當堂麻甩番晒,完全零camp味。「當初德哥搵我做『蘇基』時,有人質疑過佢,佢只係話:『得!古明華係得嘅!』咁就畀我做!我同佢之間呢份信任,老實講,應該冇其他監製會有囉!其實我之前喺《廟街.媽.兄弟》(二○○○年播出)個角色,都一樣有好多戲份,嗰套劇都係德哥嘅,所以我由零到依家,真係好多謝佢o架!」

他九三年因為憑《旺角馬場》有份提名金像獎「最佳新人」,而得到TVB羅致旗下,至今十八年,(他自己從維基百科看個人資料得知)起碼拍了四十齣劇。「《非常外父》、《十兄弟》、《大冬瓜》、《廟街》……數埋數埋,我真係做得開心嘅戲,可能八套都唔夠!十幾年喎,你諗吓!」

以我推測,叫他沮喪的原因,可能也因他大部分的角色,不是「強姦犯」、「食大茶飯的賊」,就是「茶餐廳夥計」或「收數佬」,有時角色沒有名字,連綠葉位置也稱不上。「其實我呢十幾年嚟,更多數嘅時候係唔使返工!講拍嘢,一年大概返到一百日度啦,即係一年開工拍嘢得三分一時間!

「我冇沮喪過冇得做主角,我只係希望做嘅角色係可以多啲嘢做,好似我喺《刑警》做個老差骨,我已經好開心可以喺個角色度搵到我自己嘅嘢!因為我真係好鍾意做戲!」

於《巴不得媽媽》中飾演的「蘇基」,最後原來是朱咪咪個仔!

於《怒火街頭2》內,他剃了鬍鬚做官。

配音之路

猶幸他還有配音工作可以維生。動畫電影《無敵貓劍俠》中的「皮靴貓」、《反斗奇兵3》的「大嚿」、《史力加2》的「貓貓」,還有電影《變形金剛狂派再起》的「力捷」、《三國之見龍卸甲》的「曹操」,廣東話配音都是來自他。「我入TVB之前,喺香港話劇團做,丁羽(資深配音員)有日嚟想搵啲新嘅聲,我就係咁開始做話劇團、拍電視劇之餘做埋配音工作。」

在今年接拍《巴不得媽媽》前的年多兩年,其實,古明華曾決定轉到配音組,不再拍劇。「好老實講,最初入嚟TVB嗰兩年,乜都好新鮮,跟住五年、十年、十五年,我見住好多創作,愈嚟愈被規限,乜嘢鬥志都磨滅晒,所以先決定轉去配音組。

「點知轉之前,我拍《刑警》,見到黃日華、苗僑偉、王浩信、梁烈唯佢哋好有passion同有heart,即刻提醒咗我,其實公司一直冇變過,我身邊一直都有呢啲演員,只係我自己愈嚟愈唔似個人咋!轉到配音組後,我就同自己講,要好認真咁去面對工作同生活,結果我喺配音工作度,睇咗咁多戲、咁多片反而學到好多演戲嘅嘢!跟住今年年初,德哥就搵我做『蘇基』喇!」

九三年,古明華憑這齣《旺角馬場》角逐金像獎「最佳新人」,最後由袁詠儀奪得,雖敗猶榮。

因為替《百變星君》配音而認識了星爺,其後拍了《國產凌凌漆》這場公安戲,古明華說:「星爺拍戲嘅指示好清晰,任你點做,冇乜特別要求,合作好愉快。」

最後這幕揮手,被高登截圖,成為對話時「一路好走」的icon相。

演藝青春

古明華九○年畢業於演藝學院。當年報讀,他說,多少是因為張達明「X忽痕」。「我同張達明小學二年級至中三都係同班同學,好friend。中學畢業之後,佢升讀中六,我喺我哥哥間山寨廠做工模機械操作員,有日佢唔知黐咗邊條筋,叫我玩劇社,咁就參加咗羅冠蘭有份創辦嘅『觀塘劇團』。

「後來有間叫演藝學院嘅嘢喎,羅冠蘭就提議我哋報考,反正我嗰陣份工模工悶到爆燈,好想改變吓生活,咁就一齊去報。第一年報,張達明入到,我第二年再報,先收我。」

修讀演藝戲劇系那四年,他多次強調,絕對是人生中最開心的日子!「如果冇讀嗰幾年,人生真係會好後悔!嗰陣因為有grant & loan,我就同七個男同學(陳錦鴻、張錦程、張達明、梁榮忠、《我和春天》的鍾志榮及鄧偉傑(現資深舞台劇工作者))喺上環四方街棺材舖樓上,每人每月夾三百蚊租咗間屋一齊住,八個男仔一齊住,你諗吓可以幾精采?

「我哋放咗學會喺屋裏面,一齊講番上堂嘅嘢,有時又會有人帶啲女仔上嚟,飲吓啤酒、抽吓煙、吹吓水,好開心o架真係!哈哈!返嘅學校,校舍又靚,對住個玻璃窗、望住個海吹吓水,上面又有啲dance嘅女仔畀你望吓,嗰幾年,我哋乜嘢負擔都冇,除咗犯法嘢,同對唔住屋企嘅嘢之外,我哋乜都可以做!每日過住神仙般嘅生活,你話幾咁正!我都係喺嗰幾年,先真真正正去研究做戲,探索戲劇,因為我自細都唔覺得自己有乜表演天份。」

古明華(紅圈)於演藝修讀戲劇系時,同班同學便包括了陳錦鴻、張錦程、詹瑞文、林映輝、劉雅麗和關寶慧等。

九○年演藝畢業後,與同班同學陳錦鴻,齊齊到過英國玩了一個月。

母親的愛

除了因為張達明,當年母親的一句話,也令古明華決定報讀演藝。「嗰陣我問屋企人:『如果我想讀番書,得唔得呢?』其實當時屋企係支付唔到o架,所以阿爸冇表態,因為佢真係冇能力。但係……」說時他的雙眼紅起來。「我阿媽就擺咗喺個心度……」兩行眼淚徐徐流下。「佢同我講:『弟弟(他小時的乳名),你想讀就讀啦,人生冇幾年o架咋!阿媽點都會支持你!』」他泣不成聲了。

定了定神,他說:「我阿媽呢句說話畀我嘅力量真係好勁!完全改變咗我嘅人生!」

他家裏共六兄弟姊妹,排行第五,小時候一家八口住在牛頭角福華邨(樂華邨前身)的石屋,那裏白天是造籐椅的工場,晚上是他們的起居室。「我哋全靠老竇一個搵食,每朝我阿媽會煲白粥、打隻蛋畀我哋做早餐,一個月先可能有一次落去佐敦谷度食車仔麵。好多時我哋都要幫啲造籐椅師傅煲水沖涼;佢哋食完飯,我哋要執枱;佢哋收晒工,我哋要打掃,生活都幾艱苦!」

參與校內歌舞劇《油脂》的演出,古明華說:「我揀呢幅相,絕對係因為我個樣夠靚仔,唔關朱茵(演藝師妹)事囉!」

九○年演藝畢業禮上,與另一位同班老友張錦程合照。

十七歲讀高中時的古明華,一雙粗眉令他看來甚憂鬱。

在眾孩子中,他就是最得母親歡心的一個。「我同媽媽好close!因為我由細到大,都冇嘢要佢擔心過,冇試過喺學校出過任何一個錯!佢係個冇乜受過教育,但好明白事理嘅女人,好愛自己嘅仔女,對呢個家付出好大,係個模範媽咪!」

兩年前,他的母親因老人病離世。「佢糖尿病又有心臟病,入醫院就救唔番……」他的淚水又再徐徐流下來。「不過,佢同爸爸(尚健在)嘅慈祥,對仔女嘅愛,都令我好明白應該要點樣做人父母!」

這就是真正愛的教育。

解構「蘇基」Look

 

他可以為她死……

古明華已婚,兼已有一名十四歲的女兒。「我老婆當年喺演藝讀dance school,跳中國舞,我係drama school。我哋拍拖八年,依家結咗婚十六年。」

他的太太畢業後曾是freelance舞蹈員,可惜婚後沒多久,便發生了撞車意外傷了腳。「佢跟住就做咗大懶蟲、蛀米大蟲,每年我都叫佢做嘢,佢係都唔做!」說時裝作很生氣。

至於女兒Tammi,「哈哈哈!佢好獨立!佢啲同學都知我係佢老竇,但都冇問佢攞明星相,佢亦會好淡然咁去處理呢件事,可能我實在太唔爭氣啦!

 

「媽咪對我嗰種愛,一定有影響我對我個女嘅愛!我睇住個女出世,佢咳第一啖痰好辛苦!我心諗:『我可唔可代佢咳咗佢呀?』佢自細好多病,又哮喘,又有腎病,有時見到佢病得好犀利時,我都驚佢會走咗去,我每次都會同上帝講:『不如換我咗條生命畀佢啦!』真o架!如果要我搵一個我可以為佢死嘅人,老婆都唔得!但係,個女得!」

看見他眼角再次滑出淚水,我的鼻頭也開始酸了。

女兒歲半時的一家三口全家福。

女兒七歲時,父女在山上無聊擺金雞獨立甫士。

arrow
arrow
    全站熱搜

    tvb4life 發表在 痞客邦 留言(0) 人氣()