「錯過的可再命中,老去的可再種;跌過的可再上進, 疑惑的可再信;你我當天那份勇,放太久不會凍; 擦過身邊那運氣,留待今天碰碰……」
–Shine〈第二春〉作詞:黃偉文
說起Shine,不能不提黃偉文。
2002,處男碟《電影男孩》九成詞出自黃偉文,〈祖與占〉、〈一一〉和〈燕尾蝶〉等都是八十後的集體回憶。
2012,散band五年的過氣偶像為客串Wyman作品展重組三晚咁大把,集體回憶突然被召回,復出首發主打歌,又怎少得了Y?又有誰寫Shine能應棍得過Y?


真的是善變又善忘的香港人,記憶說走就走、說回來就回來,讓這兩個28歲的小伙子,本來放下結他說好了不往回看,又再順應民意重組、出碟、開個唱。

成為2月黃偉文作品展回響最高的演唱嘉賓之一、8月的兩場演唱會門票內部認購十分鐘賣清,運氣再次擦身而過,徐天佑和黃又南都說,十年上落,早就學會不因為突如其來的幸運欣喜若狂:「呢行上得快、跌得仲快。我哋一早學識喺跌低嘅時候執子彈,冇咁易再俾勝利沖昏頭腦。」

男孩像我 黃又南
與天佑分開五年,黃又南主要時間拿去拍電影。父親破產欠債百萬,不容得他像天佑一樣給自己時間頹廢摸索。短短五年,黃又南一口氣拍了23部電影,不少爛到你聽都未聽過。片再爛,重點是五年以後又南幫父親清了債項、過了難關,半熟男孩真正脫繭,熟透了也看清了。


我從來冇諗過出邊反應係點,淨係關心自己好耐冇彈結他,上台彈唔彈得好結他。我都唔怪呢行善變、觀眾善忘,怪就怪我哋嘅第一年條路太順利,我哋太容易被順利被成功蒙騙咗一切。
06年我同又南分開發展,咁啱爹哋破產,爹哋媽咪間樓俾銀行收咗、我亦都冇再喺鯉景灣獨居,一家人搬返一齊住。我唔怪爹哋,亦冇覺得自己孭起頭家好了不起,廿幾年啦,係爹哋畀我好好嘅生活,係時候等我為屋企做番啲嘢。
一開始,我就想接多啲戲,同經理人講,想轉做動作演員。好唔容易接番啲動作片,次次都撻到周身損晒、四肢無力,人哋行埋嚟問我得唔得,明明係痛,都要死撐話得……咁辛苦開多條路畀自己,我唔想冇咗。試過有一次,不停做,做到個人散晒,去配音時喺工廠大廈坐,無端端喊出嚟,問助手:「究竟我揀條咁嘅路啱唔啱?我每日咁樣不停做,根本唔知個終點喺邊,唔知幾時可以還到債。可唔可以畀我望到個終點呀……」返到屋企,又唔敢畀屋企人知,爹哋心情已經夠差,覺得我俾佢負累咗。我一返去就衝入房,咬住自己隻手偷偷喊。真係同拍戲一樣,我好想大嗌,但係唔可以嗌出嚟。
捱足五年,清咗筆數,我冇覺得自己好巴閉、好勁,係男子漢,我成日都提醒自己,過咗一道考驗,下一刻一定仲有另一個考驗等我,再嚟時,我會知道點面對、點堅持。


呢十年,睇住自己成長、睇住自己睇清楚個世界,跌低唔緊要,最辛苦係要喺嗰個位爬番起身,冇人幫你最辛苦。我成日都話,跌咗一蚊落地下要自己執番。人哋唔會幫你執,最多都係執咗佢自己袋走。陳少琪(填詞人)都同我哋講過,呢一行起得快,跌得仲快。跌嘅時候唔使驚,最緊要識得執子彈。好似喺戰場上一樣,輪到你衝鋒陷陣時咪大把彈藥囉。事實證明,儲番嚟嘅彈藥,有一日真係用得番。

再見細路 徐天佑
01年出道、04年沒落,快上更快落的Shine,06年被華納唱片重召,合約明明包兩張唱片,結果勉為其難做完第一張《Shine On》已經被銷量及士氣打沉,各行各路。單獨發展以後,徐天佑過了兩年自信全失的消沉日子,然後寫小說、拍短片、寫劇本,現正與彭浩翔籌拍港產災難大製作,自編自導預計年尾開鏡。


我哋有九成作品都係阿Y(黃偉文)寫,今次純粹客串(Wyman作品展)咁簡單。其實五年冇做音樂,我根本唔想再掂音樂,嗰晚阿Y演唱會頭場臨上台有啲去到啱啱出道時嘅狀態,勁口乾,周圍攞水飲,竟然仲有人話我唱歌好過以前……最後有呢個結果真係完全冇預期,我哋咁多年慣咗,幾乎每一件事都唔係預期之內。我唔怪香港人善忘,十年前我哋自己都好多問題。出道時我同又南得十八歲,出邊啲細路,十八歲嘢都未識講、搵工又唔識,我哋已經要出嚟面對好多嘢。發明星夢?你太抬舉我哋啦,我哋兩個當時根本就無夢!俾人喺街執番嚟啫嘛。 06年嗰次失敗唔可以話係預期之外,冇希望又何來失望?係我哋兩個覺得冇火花,唔想再唱。出完隻碟,我真係好亂,唔知前路點行,應唔應該做、唔做呢行仲可以做啲乜……出邊啲人唔係冇搵我做嘢,而係機會搵到上門,我仲係覺得冇自信,自己有啲乜可以畀到人。明明好想轉行,出到街又覺得好冇癮,係唔係以後一世人都要俾人認得、俾人眼望望呢?


咁樣維持咗兩年,我慢慢開始寫專欄、由人哋搵我做嘢,到我自己出去搵錢,到最近,以一個導演身份去同人傾嘢。原來一個人有幾多能耐同可能性,真係要到最低潮時發掘,原來,我仲可以寫小說、拍短片、去做幕後。咁多年以嚟上上落落,今次我成日提醒自己,唔好再入番嗰件事(明星夢),我唔係一個artists,唔好喺度扮咩明星,做嘢有車接、出入有助手跟……所有嘢唔係理所當然,要睇清楚件事,我已經唔係以前嘅自己。好彩,最難過嘅嗰段日子,身邊有一個人陪。今次返出嚟,我都諗緊,實會問到感情問題,應該點答?應該講幾多呢?其實我真係好想講真實感受出嚟,不過一日未結婚都冇理由牽涉佢入嚟。只可話畀你哋聽,佢係我嘅中學同學,一齊好多年。我仲係細路,未諗到結婚生仔咁遠,但係我唔排除,有一日我會求婚求到好大單,會畀全世界都知我會娶佢!」

 

BROTHERHOOD
有關兄弟情,天佑說:「有好多嘢,連女朋友都唔會明,係得又南會明。出邊有幾繽紛、有幾多人圍繞拍手,實質上緊張時、冇自信時、俾監製同導演鬧時,返到屋企有幾苦,得又南見到。」又南說:「我哋兩個感情已經超乎咗兄弟。好似初出道喺日本住埋一齊受訓,天佑學緊小提琴。我喺樓下聽住佢堅持到最後,一日拉得比一日好,自然變得有動力有恒心,想同佢一齊進步。呢啲嘢唔係阿媽可以畀到我、唔係大把錢就可以買到,而係你身邊有一個可以咁樣影響到自己嘅人。有好多嘢,只屬於我哋兩個。」係囉,相愛十年唔使下下講出口嘅。 ####


本來只打算在九展舉行一場音樂會與歌迷慶祝成立10周年,突然翻生後加場,內部認購一早爆滿。


今年2月,Shine為黃偉文「ConcertYY作品展」擔任嘉賓,連唱三晚〈燕尾蝶〉後人氣急升全民讚好,順勢重組8月出碟開個唱。


01年日本受訓半年、04年闖台灣又住埋,加上起起落落娛圈十年,天佑和又南都說與對方感情勝過親兄弟。《壹週刊》圖片


頹足兩年,天佑開始寫書寫劇本,10年至今共推出三本《麻生》系列小說及一本遊記,圖為多年不離不棄的經理人錢小蕙。


專心拍電影還父債的又南自爆:「我日日喺內地趕戲,舊年返嚟一日出席金像獎,拍拖三年嘅女朋友就喺嗰晚同我分手。」


曾經與同期出道兼屬同一唱片公司的餅女Miki楊愛瑾相戀四年,目前天佑戀上中學同學,Miki則與永安太子爺郭永淳穩定發展中。《蘋果日報》圖片


07年又南曾經與杜如風傳出緋聞,不過男女雙方都否認。


同樣在16歲被導演陳果發掘,天佑說:「你唔好高估我哋,我哋冇發明星夢,根本就係日日返嚟發緊夢。」



arrow
arrow
    全站熱搜

    stacylife 發表在 痞客邦 留言(0) 人氣()