5呎11吋高嘅金秀炫，高大靚仔，仲有演技，想唔紅都難。
近年一眾港女都集中火力追捧韓國男團，貪班韓仔大隻又靚仔，不過除咗男團，韓國電視界亦大把年輕筍男人氣強勁，好似今年24歲嘅金秀炫最近就熱爆。本月尾無綫收費電視精選台將播放的韓劇《擁抱太陽的月亮》，就由金秀炫孭飛，套劇已於3月播出大結局，最高收視率超越 ，而金秀炫更憑此劇打低韓石圭等前輩演員，擸走《韓國百想藝術大賞》視帝寶座，成為最年輕百想視帝。韓國更有媒體報道佢人氣勁過神級天團BIGBANG同少女時代。金秀炫咁後生做視帝，睇嚟有排玩。
深情贏視帝
《擁》劇講金秀炫飾演嘅皇太子，同失憶妃嬪之間嘅驚世愛情故事，套劇唔只有苦戀，仲加插宮廷鬥爭元素。3月中播大結局，最高收視曾飆升到42.2﹪，相比同期出街，由過氣「閔大人」池珍熙主演的《拜託了，機長》大結局只得8.5﹪收視，可謂贏足九條街。而演繹癡情太子演得入肉嘅金秀炫，觀眾大讚佢對眼識演戲，秀炫更憑此劇攞埋《韓國百想藝術大賞》「最佳男演員獎」，一劇彈起。
接17廣告
金秀炫人氣爆燈，最近已接下17個廣告，仲有3部電影等緊佢拍，最勁是秀炫帶挈經理人公司Keyeast股價暴升25﹪，絕對係招財貓。不過秀炫自爆紅之後，壓力亦相繼上升，早前仲曾經過勞成疾，多次生眼挑針。由於拍《擁》劇期間工作時間太長，令秀炫話自己亦試過「差啲虛脫」。為咗減壓，有說秀炫近排經常搵friend煲電話粥呻苦，而且一向係煙民的他，最近仲愈食愈勁，一日食一包煙。話晒秀炫已經係萬人迷，食煙唔只危害健康，仲有損形象，戒咗佢啦！
女拍檔勁紅
《擁抱太陽的月亮》捧紅男主角金秀炫，而劇中女主角韓佳人，其實一早已紅爆韓國影、視甚至模界。今年3月，佳人做主角的電影《建築學概論》上映唔夠兩個月，入場人數已突破400萬人次大關，成為韓國史上最賣座愛情片。 ####
《擁》劇中，金秀炫飾演寧愛美人都不愛江山嘅皇太子，鬼咁癡情，唔怪得冧盡全韓女觀眾啦。
今年4月尾，金秀炫憑《擁》劇攞咗《韓國百想藝術大賞》嘅「最佳男演員獎」，同實力派女優孔孝真齊齊榮膺視帝及視后。
咀玉女《星夢高飛2》雖然由2AM最靚仔隊員珍雲孭飛，但金秀炫亦有份客串撐場，劇中仲同T-ARA玉女成員智妍上演咀戲，不過當然點到即止。
食大茶飯金秀炫（左二）拍住全智賢（左三）、李政宰及任達華（右一）主演，有韓版《盜海豪情》之稱嘅《盜賊同盟》亦將於7月上畫，宣傳海報中，只見全智賢搭住金秀炫膊頭，戲分應該幾重。
廣告吸金自憑《擁》彈起後，金秀炫已成廣告商搶手貨，除Canon相機外，最近一連接咗17個廣告，身價更由每部100萬倍增至200萬。即係話佢最近淨廣告收入已超過3千萬。
變潮icon 5呎11吋高，身形slim fit，唔少時裝雜誌，好似《Cosmopolitan》等都搵佢示範時裝做潮模。韓國藝人無論男女，好多都整過容，不過金秀炫就一直都係咁嘅樣冇乜變，應該冇執過。
留言列表
