告崇恩背後的燈箱及手持的燈均是自家LED燈。
名人後代 剛滿廿八歲的告崇恩,一直只被標籤為葡萄牙裔著名練馬師告東尼的兒子,最近卻上了八卦雜誌封面,圖文並茂「車載」無綫藝員李詩韻,一個家逢逆境的藝人被寫成專溝富二代,更涉撬人牆腳,介入告崇恩和拿督女莊思華的戀情;男主角告崇恩因此導致facebook內過百張私生活照俾人攞嚟刊登,加埋兩年前試過被寫成蒲友,告崇恩終於按捺不住說:「我不得不澄清,我從來沒跟李詩韻拍拖,我不希望再有任何花邊新聞影響自己的工作,我唔想人哋覺得我係一個playboy,亦不想影響我的家人,我要澄清讓人知道我專心做嘢。」

低調惹麻煩
和李詩韻的緋聞為你帶來困擾?告崇恩(Sean)說:「好煩,我平時好低調,我識佢以前男友阿Phil,係好好朋友。嗰日係common friend叫李詩韻出嚟,仲有一班朋友一齊食飯,我唔鍾意人亂寫。」是否因此被父母怪?「人哋要做古仔無辦法,佢哋唔會鬧。」Sean又反駁上月沒有和李詩韻在IFC食飯,「當時我在新加坡,點食飯?仲話佢坐我對面不停放電,相入邊嗰個唔係我,我唔知幾時變得咁高。」他的真正女友是前港姐莊思明孖生姊姊莊思華(Mona),兩年前報導指他們狂歡夜蒲連踩五場,Sean不忿說:「當日只係見見個朋友,飲咗一杯紅酒,十分鐘就走咗返屋企,跟住又話我夜蒲,去咗五個場合,喂,我去咗十分鐘就返屋企。」所以二人雖然拍拖三年多,有段時間索性假分手轉玩地下情。「成日話我哋出去玩,我哋唔想煩,Mona都想我事業好啲。」

服兵役
又難怪Sean緊張事業,因為他在新加坡出世,曾在當地服兩年半兵役,比同齡的遲出道,他要急起直追。「我阿爸廿七歲已經生咗我,佢十幾歲已出名,所以現在要爭取番。」他十八歲在英國讀完中學後,便返新加坡服了兩年兵役,然後在英國European Business School London讀完International Business Management後,又再返新加坡完成最後半年的兵役。早上四時半起床做運動,學砌槍、射槍和戰略等。「試過喺jungle內七至九日,又無得沖涼,日日用白色嘅prickly heat powder整乾淨自己,經過呢啲生活,你會appreciate好多嘢,甚至沖凍水涼已覺得好滿足。」他又試過要在沙地、石屎地上爬百幾米,「有人喺你頭上開機關槍,子彈係真,企起身就有機會俾人射低;又要爬落坑渠,坑渠又放晒豬內臟,要你feel到好似真係打仗,當時得件長袖軍服無pad護手,爬完手臂流晒血。」

棄馬從商
為何不做騎師?他坦白說:「It's not easy when你老豆係告東尼,如果daddy無咁成功或者可以,唔想成世人生存在他的影子,想創自己嘅路。我知我呢世人都唔會做到佢咁叻,依家都見唔到一個本地騎師好似我老豆騎得咁好。」不過告東尼也想子承父業,告崇恩三歲時,父親已帶他騎馬,「老豆係呢行,點都要識啲,細個也參加過雙魚河比賽都贏過,由細已開始餵少啲奶俾我,等我無咁大隻,點知我十歲已高過佢大隻過佢,咁就已經無得入行。」大學畢業服完兵役後,約三年前他回港做金融,「一入行就金融風暴,無咩做啦。」幸好新加坡朋友提議他一齊搞環保事業,於是兩年前他和朋友開了間REVOLITE LED Ltd(綠環燈有限公司),搞節能照明。「係慳到六至八成電,我哋唔係做retail,唔係話今日買五盞、十盞,我哋target係銀行、酒店,跨國公司和有社會企業責任嘅公司。」莎莎便用他的產品,「佢哋都好注重環保,佢哋都好接受新事物。」 Sean不做騎師都好,起碼其母Paulene不用顧多瓣,「Daddy好辛苦,佢成日騎輕磅,一定唔可以食嘢,有時只食維他命丸,飲水都飲好少,老豆奮鬥心好強,佢成日話唔係第一就包尾,有次喺法國墮馬差啲返唔到來,俾後邊啲馬踩過晒,呢度斷骨、嗰度斷骨,有啲騎師跌咗一兩次就驚,佢照騎,發高燒又騎,所以老豆好勇敢,佢轉做練馬師,我哋成家鬆口氣。」到Sean想考電單車牌時,母親亦叫停,「之前阿爸經歷咗咁多,到阿媽對我時,佢覺得好多嘢避到就避。」不過鬼馬的Sean,讚完老豆又不忘讚母親,「媽都辛苦,要顧我、daddy和妹妹,daddy話成功男人背後一定有個好嘅女人,呢樣嘢好真。」其實Sean都好知女人心,影相時,又和攝影記者一起搬粗重的燈箱,風度十足。 ####

 


告崇恩經常和妹妹告崇安(右一)、父母一齊拉頭馬,「媽咪鍾意屋企人團結。」


Sean和莊思華拍拖三年多,二人經常出入馬場,月初有指李詩韻(圓圖)介入戀情。


他還計劃開新金融公司,「籌備中,時機成熟會和大家分享。」


告東尼很支持愛兒創業,「佢只要求我要好有心機,唔可以懶。」


七歲時他每星期均去雙魚河學騎馬。


一家四口全家福。


Sean(右)服兵役時身形最fit。

arrow
arrow
    全站熱搜

    stacylife 發表在 痞客邦 留言(0) 人氣()