相戀年半,雙陳戀感情穩定,筍盤陳豪最叻打外父、外母牌,越洋拜見完仲識幫襯陳父有份的茶餐廳。
相戀年半,陳豪陳茵媺呢一對打正情侶檔旗號搵食銀,愈戀愈高調,加埋二人定情力作《心戰》出街,更加奉旨拍拖更宣傳新劇,難怪日日傳婚訊,人人等睇雙陳開花結果。
雖然陳豪慣性迴避婚訊,不過兩家人愈行愈密就證據確鑿。本刊更發現陳茵媺家境唔錯,父親在港擁有兩間中型茶餐廳,更有員工爆陳豪係該茶餐廳擁躉,擺明愛屋及烏兼行外父政策!

 
新劇《心戰》上映1週,秉承戚其義、周旭明風格,破格兼血腥被師奶群插、收視最高有29點,唔算差。其實換個觀點睇,前年尾拍攝的《心戰》係男女主角陳豪、陳茵媺撻着之作,明明眉來眼去互生情愫,偏偏要喺套劇入面扮兄妹,情侶檔八卦搬上電視機,咁咪啱晒班師奶心水有番睇頭囉!

門當戶對
雙陳呢一對相戀以來,人人睇好,除咗外形襯絕、笑容一致外,本刊發現,兩人背景亦相差無幾,門當戶對。陳豪澳洲長大,已故父親從醫,家境小康,本刊亦發現陳茵媺一樣出身小康之家,父親陳炎森在土瓜灣及柴灣的茶餐廳「麗晶餐廳」有股份。陳父陳母近年生意全權交由拍檔管理,五年間買賣九龍站豪宅擎天半島及將軍澳私樓斬獲共200多萬港幣。陳父陳母則大部分時間留在加拿大養老,閒時才飛返香港探望女兒。

茵媺冧笑:唔知佢幫襯
僅僅相戀年半,公認筍盤陳豪就大行外父外母政策,初相識時趁住美加登台之便,親身登門陳家造訪外,陳父的茶餐廳員工更爆料指陳豪不時幫襯,外賣三文治配咖啡。週一(28日),陳茵媺在電視城為新劇《情越海岸線》開工,一聽陳豪就難掩甜笑:「吓?我唔知佢有幫襯爹哋嗰度喎……我諗佢應該唔會喺嗰度見到爹哋,因為佢已經兩年冇返香港。(陳豪一心開咖啡店,有冇向未來外父取經?)取經即係咩呀?噢……Moses話想plan做其他生意,你哋都係問番佢啦!」明明同女朋友同居深井,山長水遠入柴灣幫襯外父,一早話陳豪係筍盤中嘅筍盤啦!

估錯晒 陳茵媺唔係秋官女
《心戰》開播首週已經極具神劇潛質,成為網上熱話,唔少網友同秋官(靳少楠)一樣,一廂情願希望陳茵媺就係被擄後失蹤25年嘅女靳芷縈。真係唔好意思,大家估錯晒,靳少楠嘅女直到劇末都唔會交代去向,極有可能已經遭遇不測。秋官掛住寶貝女、成日夢中見嘅何傲兒亦只係幻想中女兒成人模樣;而陳茵媺身份亦冇大家諗得咁玄妙,實情真係跟陳豪有血緣,係佢親妹妹。

專訪最搶心魔
《心戰》播映首週陳豪殺人燒屍夠搶,但論造型就唔及飾演陳豪心魔嘅4位演員,其中以阿戚女友簡慕華和黃德斌最搶。 德斌《V煞》look夠激,但簡慕華飾演的「慾望」心魔更搶,第4集瞓身誘陳豪令網友嘩然。原來簡慕華事前狂煲一代性感女神莎朗史東嘅《本能》,每次埋位前仲要睇一睇,不過佢話:「接到劇本後監製叫我睇多啲情慾電影,我睇得最多係《本能》,學莎朗史東戲中講嘢陰聲細氣,成日挨身。至於第4集引陳豪其實係碎料啫!我掂唔到陳豪㗎‥…之後仲激啦,有幾場床戲,有一場望落去幾乎全裸!」而德斌就話:「有人話我造型抄《V煞》,我都未睇過,我睇啲fashion書諗出嚟。我亦都有睇過《追魂交易》……阿戚冇控制我,我做番自己就得。」

 
簡慕華劇中飾演陳豪慾望,不斷誘惑陳豪,問佢現實中有沒有誘惑人或被誘惑,佢話:「我唔識誘惑人亦冇需要,更加無人誘惑我啦!套劇出咗街之後會有啩!哈哈!」 攝影:范仲良化妝:Janice Chan 髮型:Jalian 服裝:izzue 形象:Bryan So

 

心魔無限復活
陳豪雖然一次過殺晒啲心魔,不過死後竟然可以全部復活,先知道佢哋4個係自己心魔(Henry代表的良心除外),之後更成為朋友。

邪惡Eric
黃德斌扮相有啲似《V煞》,飾演酒吧老闆,其實係代表陳豪邪惡嘅心魔。被陳豪用飛刀殺死。

慾望Michelle
簡慕華代表陳豪嘅慾望,劇中被陳豪扯頭撼牆殺死。髮型被網友話似天線得得B,她說:「每次要梳兩個鐘,係德斌提議。」

陰險Edwin
李霖恩代表陳豪嘅陰險,被陳豪爆樽扑死,但之後復活。

暴力Martin
何啟南代表陳豪嘅暴力,被陳豪掟埋牆後被硬物砸死。為演好呢個角色日日狂操gym,練到42吋胸。

良心Henry
戴耀明代表陳豪嘅良心,第5集被黃德斌飛樽死,雖然喺片頭曲尾段見到佢摑陳豪,不過戴耀明話:「冇用到呀,應該係trailer嚟!」

透《心戰》血腥結局
《心戰》播映一星期,除咗睇陳豪點殺人,錯縱複雜嘅劇情,亦係網友狂追嘅原因。第6集開始除咗交代秋官點樣認識陳豪、陳茵媺,亦會幫助笨差佬揚明,點樣拉炸彈狂徒楊英偉。陳豪最後幾乎見人就殺,最後死喺秋官玻璃下,而邵美琪亦因為想幫男友陳豪頂罪變獨臂殺人王,殺揚明後,最後用收喺假手內嘅刀片割脈自殺,真係血腥到尾,秋官就生死未卜,主角死剩陳茵媺。

陳豪俾秋官玻璃插死
結局篇秋官終於證實陳豪係殺人兇手,更同佢4大心魔講數,可惜最後傾唔掂,更同陳豪打起上嚟,其間胞妹陳茵媺阻止。陳豪有感胞妹幫外人,於是扼陳茵媺頸,秋官想阻止陳豪時,用玻璃將陳豪插死。

邵美琪獄中刀片自殺
劇中飾演陳豪女友嘅邵美琪,及後知道陳豪係殺人兇手,為咗幫陳豪頂罪,於是幫手殺人,更將追查陳豪嘅差人揚明殺死,之後被捕入獄,將刀片暗藏假手,喺獄中用刀片割脈自殺。

秋官癲咗殺埋蔣志光
除咗陳豪、邵美琪死外,劇中飾演陳秀珠老公嘅于洋,亦被陳豪所殺;而秋官因太過投入角色,用繩勒死飾演劇團導演嘅蔣志光。

馬海倫撞牆
劇中飾演陳豪助手嘅趙希洛,因得知陳豪惡行險遭殺害(小圖),而成日睇唔起陳豪兼話佢揸車慢嘅外母馬海倫,陳豪專登接佢再將車撞埋牆,馬海倫唔死得都嚇死咁滯。

海潮沙畫12粒鐘畫晒
《心戰》除劇情另類,亦破格以沙畫配以一段角色心聲作每集結尾。監製戚其義請嚟曾在陳奕迅《一絲不掛》MV露兩手嘅著名沙畫師海潮,以沙畫將劇中人的情感思緒表達出來。本刊上週五(25日)致電海潮,佢話:「最初係阿戚(戚其義)聯絡我嘅,劇中沙畫係睇晒個劇本後,消化咗先去度點畫,而每集都係用自己手法去演繹,再配合編劇嘅旁白。我一口氣12個鐘拍晒30集沙畫,每集畫4至5次,盡可能一口氣去畫。(酬勞滿意?)今次唔計較錢嘅,但5位數點都有!」

吸塵機唔夠力
第二集陳豪將天叔(招石文飾)用吸塵機抽真空,及用陶瓷爐將天叔燒成灰。不過浸大生物系教授黃港住表示:「用吸塵機抽真空防屍臭應該唔得嘅,因為身體內有水分及氧氣,加上吸塵機吸力唔夠,唔使兩個鐘就入晒空氣。」而從事殯儀館嘅師傅就話:「過千度溶爐係可以燒溶人,不過會剩番頭骨同尾龍骨,唔可能全部變灰。」 ####

 


父陳炎森


陳父陳炎森兩年前曾回港陪愛女物色物業,現時茶餐廳業務交由拍檔管理。《壹週刊》圖片


據柴灣麗晶餐廳職員透露,老闆準女婿陳豪係熟客,最鍾意買三文治醫肚。


三文治送咖啡


周一(28日),陳茵媺甜笑答記者:「Moses成日幫襯麗晶?係咩,唔知佢呀。」


柴灣柴灣麗晶茶餐廳陳父擁有兩成股份,職員表示陳豪時有幫襯,但就對陳茵媺係太子女不知情。


土瓜灣


與陳豪同居前,陳茵媺居住的清水灣半島物業由陳父及茵媺持有,08年以253萬買入,現值380萬。另陳茵媺亦於中山持有一單位,是當年獲選港姐冠軍的大會禮物。《蘋果日報》圖片


陳茵媺與陳豪現時於深井碧堤半島同居,陳豪卻山長水遠去柴灣幫襯外父。


樹下冇屍網友揣測劇內經常出現的大樹是秋官女藏屍地點,實情純屬巧合,大家諗多咗。


秋官劇中女兒25年前被綁,最終劇情唔會交代去向,恐怕已遭不測。


阿戚冇控制我, 我做番自己就得。有一場望落去幾乎全裸!


德斌、簡慕華私下好friend,就算拍照時擺親密甫士亦唔尷尬,更主動叫德斌攬實啲。


第4集簡慕華騎住陳豪,問佢陳茵媺有冇在場,佢話:「佢好似唔喺度喎!不過嗰陣佢哋都未一齊啦!我同阿mo咁熟,點會尷尬。」


電影《V煞》


沙畫師海潮


德斌爆料:「嗰場其實仲有陳豪磨頭骨同尾龍骨㗎,不過太激cut咗咋。」


浸大生物系教授黃港住

arrow
arrow

    litalife 發表在 痞客邦 留言(0) 人氣()