經常表演的羅之琦，初影相時有點生硬，但十分鐘後已笑得自然。

新女上場

羅之琦的阿姨是著名指揮家葉詠詩；懂拉大提琴和彈鋼琴的母親葉羨詩，現為葉氏兒童音樂實踐中心的副音樂總監。她的外公葉惠康更是有分量之人，於七三年在浸會學院創辦音樂系，任職系主任廿年。一樣擅長彈鋼琴、拉小提琴的羅之琦，卻選擇做室內設計師。
幸運的是，當其他大學生未畢業已擔心失業時，廿三歲的羅之琦已有自己的室內設計公司，幫男友屋企的上市公司、金利豐集團的酒店做設計。得人提攜，羅之琦說倒要靠點實力，「我畢業嗰年，我是成績最優異嘅學生；又贏得IIDA New York Chapter 2010 Student Scholarship冠軍；亦被學校選中參加Donghia Scholarship，每間設計學校只能選兩個代表去參加，我無贏，但能夠被提名已是很大榮譽。」

 

學成返港
羅之琦（Kelly）的咭片以鮮色花紋為主，談到她的設計風格，她說：「我啲嘢好鮮色，花得嚟好簡單。」 Kelly年多前在紐約的設計學校Parsons School of Design畢業，著名的校友有Marc Jacobs及Tom Ford等，她一畢業便有工作。「我喺美國都有job offer，教授問我幫唔幫佢做嘢？」不過拍了六年拖的男友即金利豐行政總裁朱李月華兒子朱俊浩決定返港，Kelly亦跟着回來，並順理成章幫他們的皇家金堡及澳門君怡酒店做設計，「我做佢哋嘅顧問，我自己又可以在外收project。」她笑着說。至於外公在康怡的葉氏兒童合唱團，亦由她操刀做裝修，「有人睇過葉氏後，想搵我整。」她最開心幫皇家金堡的中菜廳重新設計。「最鍾意做啲吉嘅project，成個拆晒再做好開心。」不過男友母親話晒喺《福布斯》富豪榜排名三十二，身家達九十六億，正所謂相見好，一齊工作會否有衝突？她俾面話：「她好開通，如果佢覺得唔啱佢間酒店，佢會講，我講得啱，佢會照去做。」萬一遇到奄尖客人，Kelly會否拒絕接job？「盡量找個平衡點。」

十歲喪父
Kelly說話時中英夾雜，她解釋：「我出生不久就去美國洛杉磯生活，十歲返來香港讀國際學校，中學畢業後去了紐約讀大學。」十歲返港，是因為在美國從事時裝生意的父親因心臟問題過身，母親結束了她在美國創立的合唱團，帶着她和弟弟返港幫外祖父打理葉氏兒童合唱團。會否自小覺得缺乏父愛？她淡然說：「爸爸一直錫我，媽媽盡力愛已足夠，唔會諗缺少咗。」近年母親再婚，她明白說：「媽咪都要人陪，都明白。佢（繼父）好好人，我們一齊去巴西、南美。」

着重音樂
外祖父既是作曲家，又是指揮家，外祖母是鋼琴教師，受着家人影響，Kelly鋼琴已考獲演奏級，小提琴亦有八級，亦擅長跳踢躂舞，細她兩年的弟弟Eugene現在讀醫，鍾意打鼓及吹色士風，「我細個要學唱歌，樂器喺中學時已經考咗。」她的母親及阿姨也反叛過不想練琴，Kelly說她可以很專注，因為她寧願趕快完成，她便可以做自己喜觀的事，她蠱惑說：「我鍾意音樂，但我鍾意跳舞多啲，我可以focus on跳舞。」她十五歲開始隨家人帶學員出國表演，「我負責教跳舞，暑假便返去教，代表香港，所以要演好啲。」每年都重複教學生，Kelly不覺悶反而很享受出國可以欣賞不同文化。「我哋每年去不同地方，○一年我哋去俄羅斯，俄羅斯當時未發達，佢哋午膳食一塊乾麵包和好乾嘅芝士，我哋香港人食飯好多碟餸，覺得自己好幸運，亦想知別人嘅故事多啲。」 Kelly已踏足過西班牙、芬蘭、南非、埃及、巴西、智利、紐西蘭、希臘，德國等地觀摩不同建築物，啟發她向室內設計發展。「所以我每年都好期待去不同國家。」也因為家人已從事音樂，她更想嘗試新事物，「呢一刻我想發掘我在設計這行的潛能，但要我行祖父母的路我也很高興。」但教下一代跳舞，不能凱旋而歸時壓力會否很大？她笑笑口話：「我哋唔做比賽，因為公公覺得比賽對小朋友唔好，十隊得一隊贏，得一隊開心，對小朋友自信心唔好，我哋想分享不同文化多過要贏。」 ####


男友（右）母親為保良局副主席，Kelly便曾扮電影《芝加哥》中的Catherine Zeta Jones造型，出席該局的扮嘢晚宴。


她與男友、男友父母（前右一、二）出席保良局活動。左一為前主席龐盧淑燕。


說到她的中文名，她唔介意自嘲說：「好易記，攞支旗。」


她也執過皇家金堡的酒店房。


皇家金堡大堂經她改裝後，變得光猛、新潮。


外公的音樂中心在裝修後變得更整齊，她並用了外公喜歡的綠色。


她為外公的音樂中心設計了一個歌劇院，「公公想學生有多啲演出機會，唔使租人地方。」


五年前全家福。（前排左至右）Kelly、細姨葉亦詩女兒、葉詠詩女兒。（後排左至右）Kelly弟弟、母親、細姨、細姨丈及手抱兒子、外公、外婆、葉詠詩及其子。


三歲她學跳芭蕾舞的照片。


外公教她拉小提琴。


○四年和弟弟去美國表演。


三年前去歐洲表演拉丁舞。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄