白健恩落手落腳執貨，又搞生果籃，更不時眼定定望住莊思敏。

31歲的莊思敏，自去年與吳浩康分手後，一直不愁寂寞，一度有指她被富二代林忠豪力追。不過林忠豪未得到手，莊思敏又覓得新對象，對方是落選港男白健恩。上周六（24日），莊思敏在自己剛開張的時裝店打躉，白健恩竟然落舖頭幫手，二人細聲講大聲笑，無視途人注視，有如蜜運中的小情侶。求證莊思敏，她例牌否認，不過就大讚對方，她說：「佢好肯幫人嘅，同佢做朋友好舒服。」開舖搵錢之餘，更順便瘟仔，莊思敏一舉兩得！


拿督女莊思敏出名夠搏，與吳浩康分手後的她，積極銀，除了主持無綫生活台節目外，更不停出席大小活動。最近她更撈多瓣，與孖生妹妹莊思明、莊思華合資200萬，在中環開設時裝店「TINSELTOWN」。上周五（23日），時裝店開幕當日，莊思敏全程風騷到極，她說︰「呢個BB係催生嘅，人哋十月懷胎，我哋兩個月就搞掂，多謝幫手催生嘅朋友。」據知其中有份催生的朋友，就包括當日有份撐場的前落選港男白健恩。

孖住睇傢俬
上周六（24日），記者發現莊思敏孖住白健恩到舖頭打躉，女方坐在收銀處，而男方就幫手整理新衫，猶如男主人。之後拎住果籃的莊思敏，表現吃力，白健恩即時獻殷勤代勞，只見二人細聲講大聲笑，旁若無人，狀甚溫馨。之後他們再步行到附近傢俬舖，其間見到途人眼望望，二人即時彈開，表現避忌。不過於傢俬舖上層時，二人又忍唔住黐埋一齊同試梳化，二人在梳化上連體un足15分鐘，不過齋試冇買。最後白健恩送莊思敏返新舖後就離開，頗有風度。

學做戲撻着
據知莊思敏半年前與白健恩因一齊合作講述愛滋病的舞台劇《滋．情．識．趣》而認識，雖然二人只合作三場，但一拍即合。「佢哋好快熟，第一次見面已約埋一齊去綵排。」據知二人現時更一同跟詹瑞文太太甄詠蓓學演戲，一星期一堂。「佢哋私底下成日傾點做戲，依家因為一齊上堂愈見愈密，加上Ronan（白之洋名）又好主動話要幫手搞新舖嘅嘢，執頭執尾都冇所謂，所以莊思敏對佢印象都好好。」莊身邊密友透露。周二（27日），莊思敏向本刊記者承認和白健恩經常見面︰「佢好肯幫人嘅，知道我開舖都落嚟幫手，佢係一個好怕醜嘅男仔，未諗得咁長遠呀！依家做朋友都好舒服呀。」至於白健恩則說：「我都好耐冇拍拖，因為我比較靜，所以活潑型嘅女仔啱我，我都好欣賞佢咁爽！」

親身直擊　專賣中上價美國衫
莊思敏三姊妹和她們老死劉晨芝合資二百萬的女裝店「TINSELTOWN」，位於中環荷李活道。記者周一（26日）黃昏時分親到該店，發現店舖位置較偏僻，人流不多。店員透露全部售賣服飾均是來自美國：「呢啲都係美國藝人Katy Perry同Paris Hilton成日着嘅牌子。費事啲客撞衫，我哋入貨係一件起兩件止。」大部分款式以性感為主，價格幾百蚊至幾千蚊都有， 「如果買夠八千蚊，我哋都會俾折㗎！」銷售目標擺明是捨得買衫的中環OL。

啅盡名氣男
名模出身兼拿督千金的莊思敏，自去年和拍拖五年的吳浩康分手後，便積極覓食，短短一月間便被拍得和多個名氣男密會。

陸恭和
去年9月初莊思敏被拍得與政界名人陸恭蕙堂弟、活樂集團董事、兼是官恩娜前緋聞男友陸恭和，孖住食飯睇戲一take過。

叢培崑
陳志雲前助手叢培崑，於去年9月中趁女友返台灣之際，和莊思敏去high tea，二人在餐廳內傾足兩小時，認真吹得。

林忠豪
莊思敏於去年9月底被拍得與廖碧兒緋聞男友林忠豪撐枱腳，之後莊更直言不排除發展。可惜緋聞爆出後，林就被指鱷魚頭老襯底借車溝女，從此冇晒聲氣。 ####

 
白健恩幫手整理櫥窗公仔，相當熟手，莊思敏即舉起拇指大讚對方good job。

 
落選港男白健恩今年31歲的白健恩曾參選2010年《香港先生》選舉，早前更於卓韻芝的新節目宣傳片上半裸上陣。


有舞蹈底子的白健恩，參選期間，一字馬的疑似裸照曝光，成為一時佳話。


黐實行街離開舖頭後，二人步行去傢俬舖，其間二人傾唔停嘴，全程黐到實。


連體un 二人走到傢俬舖的上層時，不避嫌黐實揀傢俬，身貼身試梳化，態度親暱。


上周五（23日），新舖開幕當日，白健恩不避嫌黐住莊思敏影相（右一、 二）。而身旁的莊思明指：「佢哋係好夾㗎，不過應該唔係拍拖啩。」


四百呎舖面，算寬敞。


舖頭位置偏遠，人流不多。


《壹週刊》圖片





arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄