close


我哋未結婚先興奮呀！（設計對白）洪天明同周家蔚都係後生仔女，估唔到派餅揀中式囍餅。兩個人笑得咁冧，真係愈睇愈有夫妻相！

洪天明同周家蔚將於下周三（21日）同周五（23日）喺尖沙嘴W Hotel舉行婚宴，依家梗係忙到爆！周一（12日）下晝，天明車住未來老婆返TVB，女嘅揸住疊帖同餅卡周圍派，男嘅就繑埋雙手指指點點，夫唱婦隨！


問家蔚仲有咩未搞掂啦？佢好老實咁話：「其實我哋未過大禮。」而天明就話：「幾個月前做咗婚前身體檢查嘞，但到依家都未去拎報告。」吓！未過大禮就派帖？根據中國傳統，過大禮係婚禮中最重要嘅儀式，代表雙方正式訂立婚約。要先搞好過大禮，之後一切至會順順利利！不過，天明同家蔚讀番書大，都話無計呢啲。至於禮金有幾多？家蔚就尷尷尬尬話：「吓，唔知呀。」明顯護住未來老公。

洪媽媽大讚新抱
除咗兩位準新人忙，天明嘅韓籍生母曹恩玉都嚟咗香港幫手搞婚禮。第一次做奶奶嘅洪媽媽，喺周二（13日）下晝約埋親友去尖沙嘴試晚裝，其間仲用廣東話大讚天明有眼光，娶到個好老婆㖭！媽咪姐事後同家蔚講奶奶好like佢，未來新抱仔就笑晒咁話：「Auntie長期住喺韓國，我哋去過探佢好多次，佢個人好『腍善』，keep得好好，大家相處得好開心。（奶奶有冇話好鍾意你？）嘻嘻，呢啲心照啦！」其實，大禮未過就派帖，絕對犯禁。而洪氏伉儷連驗身報告都未拎，啱啱又傳出周家蔚有咗㖭！不過，準新娘叫媽咪姐代佢澄清，話呢單純屬流料，呢幾日佢正值女人唔多方便嘅日子呀。大家咪咁心急！天明同家蔚都話會全力以赴，趕造龍B㗎。

洪媽媽緊張


父母離異多年，但洪天明不時都會去韓國，探望長居當地嘅媽媽同外婆，近年仲帶埋女友周家蔚出席家庭活動，都算好有孝心。

勝在「姊妹」多
平時見周家蔚總係默默企喺洪天明後面，非常小女人。不過講到姊妹團陣容，佢就絕對贏晒！單係圈中美女已佔10個，另外仲有十幾個圈外好姊妹㖭。而洪天明嗰邊，除咗派出樂樂「鬥」盈盈之外，唔少「兄弟」都做咗人老公，班「姊妹」睇怕無乜着落咯。

過大禮知多啲
據摩登大妗姐歐惠芳表示，過大禮是婚前嫁娶最重要的習俗，要取好兆頭就必須過大禮，正所謂：「大禮過得好，嫁娶一定好！」男家會選擇一個吉日，帶同禮金和各種禮品到女家，而女家亦會準備回禮禮品。歐惠芳話：「過大禮就係確認呢頭婚事，先過禮，後派帖，呢個係傳統習俗。以前過大禮好繁複，依家好多年青人都從簡，不過從簡都好過唔做。一般女家都好重視過大禮，可以話係要告知天下，風光嫁女！未過大禮派咗帖嘅話，可以喺結婚前補做番嘅，有好過冇。」 ####


周家蔚負責同化妝間啲同事social，洪天明就飲住咖啡喺旁邊聽。呢對洪氏伉儷嘅分工都好清晰。


待嫁新娘子特別興奮，拎住成疊請帖餅卡喺化妝間騰嚟騰去。洪天明就不時嗌住未來老婆，「仲有呢個未派呀！」


媽咪姐走過去恭喜洪氏伉儷，雖然男嘅好似有啲「唔嗲唔吊」，女嘅就甜絲絲咁望實未來老公發言，但洪天明其實都好緊張家蔚，仲提佢記住攞身體檢查報告。


洪金寶好贊成洪天明娶周家蔚，而哎吔阿媽高麗虹亦猛讚佢係好女仔，有家庭活動都預埋周家蔚嗰份。呢杯新抱茶，飲得好開心！


周二（13日），周家蔚婚前當旺，繼續出騷賺錢。有傳佢懷咗龍B，但呢日佢着住四吋高踭鞋，又一手抱起細路仔，好明顯係誤傳啦！


洪媽媽同親友去尖沙嘴金巴利街嘅上樓禮服店試奶奶衫，佢一邊同試緊衫嘅親友傾偈，一邊量度自己嘅身形，非常貪靚。


多年前，洪金寶去韓國拍戲，戀上洪天明媽媽，閃電結婚，生咗三子一女。91年，佢哋緣盡離婚，洪金寶之後遇上港姐冠軍高麗虹，而洪媽媽就移民加拿大，之後再長居韓國。



arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄