阿倫有聽過Neway有自己的歌曲播放,斥責對方處事有問題。李克勤表示連新歌都有得唱,實在講唔通。

兩年前,以環球為首的五大唱片(HKRIA)控告Neway卡拉OK侵權偷播歌曲,官司一直處於膠着狀態。本刊收到消息,近日五大曾主動聯絡過Neway揸fit人薛嘉麟,希望就版稅問題坐低傾掂數。不過,食足兩年免費餐的Neway則懶理官司繼續偷播,加上薛二少忙於籌備本月20日跟諸葛紫岐的世紀婚禮,他竟然繼續大玩拖字訣。歌星版稅收入受影響,難怪環球歌星齊聲鬧Neway:「佢哋好過分。」


93年Neway卡拉OK由薛濟傑成立,據知每年需向「五大」支付四十萬至近百萬的版稅,銀碼多少視乎唱片公司旗下歌星數目而定。但自09年起,Neway開始沒有向五大支付版稅,五大即入稟向Neway提出訴訟。同年薛濟傑二子薛嘉麟正式執掌Neway,而薛嘉麟坐正後,亦一直對官司採取拖字訣。侵權播歌官司至今已超過兩年,但記者日前到位於旺角中心的Neway卡拉OK時,仍可見到五大旗下歌星新舊歌曲可隨意點播,而環球旗下當紅歌手更成為偷播歌曲的重災區。最離譜是連吳雨霏加盟環球後的新歌〈我本人〉,亦以原裝MV奉上。

五大放軟態度
對於老闆薛嘉麟繼續明目張膽偷播歌星新歌,Neway一職員向記者私下透露:「如果冇咗Eason嘅歌,淨唱英皇歌星嘅話,啲客未必會幫襯,你估公司冇算過度過咩,就算輸咗官司,罰嘅錢有限,最多都係幾十萬,仲要官司起碼拖三幾年,點計都有賺。」明知官司有排拖,據知五大近日局住放軟態度,放風約薛嘉麟出來拆掂數。「五大知咁拖法唔係辦法,咪放風想同Neway傾吓,仲講明版稅銀碼可以有商量,不過對方就回覆話冇時間見佢哋。」知情人透露。

歌星鬧爆
對於Neway拖字訣,身為環球老大的譚詠麟表示:「我都聽人講話佢哋嗰度仲有得唱我嘅歌,咁做真係好有問題,好過分囉!」而李克勤亦表示:「連新歌都有得播,就講唔通嘅,不過呢啲留番俾公司搞啦!」另外,擁有不少hit歌的張敬軒,亦鬧爆對方唔俾錢:「版稅係歌手其中一個主要收入來源,佢哋咁做明顯對我哋歌手唔公平,Red Mr.同K Net都係俾錢先播,佢哋(Neway)咁大間公司都仲係咁,好離譜囉!」

拖準老婆食晏
家族擁過億資產的薛嘉麟,將於本月20日搞百萬婚禮,筵開120席迎娶諸葛紫岐。公私兩忙的準新郎雖然無暇約見五大,日前卻被記者發現帶諸葛紫岐到跑馬地大少爺午膳。日前記者在公開活動上就繼續偷播五大歌曲一事問過薛嘉麟,他聽罷只冷笑了一聲說:「今日日子咁開心,我唔講呢啲!」繼續貫徹迴避態度。

新歌任唱
本刊上周曾到位於旺角中心的Neway,當日仍有五大旗下歌手歌曲任唱,連新加盟環球的吳雨霏新歌〈我本人〉都有,懶理官司進行中。 ####


薛二少薛嘉麟對官司大玩拖字訣,聽到記者提問即冷笑一聲,不肯回應侵權播歌一事。


本月將做老襯的薛二少,未受侵權官司影響,日前陪未婚妻諸葛紫岐到跑馬地大少爺茶餐廳食晏。


Neway有不少克勤及阿倫的經典歌曲,就連他們《左麟右李演唱會》中的大部分歌曲都有。


環球高層黃劍濤回應時表示對事件感到無奈,已盡力與對方斡旋的他表示:「其實我哋都想同對方快啲處理呢件事。」


除環球歌手外,華納歌手周柏豪亦有歌曲遭Neway侵權偷播,反而同公司的方大同和薛凱琪則倖免於難。


Eason新歌〈苦瓜〉任點
陳奕迅的歌曲一向是各K迷的頭號心水點唱,〈苦瓜〉、〈無人之境〉等原裝MV榜上有名,成為受害者重災區。


Kary剛加盟即上榜
剛於去年尾加盟環球唱片的吳雨霏,轉會後首推主打歌〈我本人〉,Neway足本奉上。


唔俾錢都有得唱?(真實對白)


張敬軒新舊歌有齊
另一位多hit歌的軒仔,其新歌、hit歌繼續有得唱,排位更放於男歌手第一頁。


對歌手好唔公平!(真實對白)

arrow
arrow
    全站熱搜

    litalife 發表在 痞客邦 留言(0) 人氣()