踏入龍年，「福祿壽」繼續人氣高企，而且更生龍活虎，做足準備，進駐紅館大舞台開show。阮兆祥、王祖藍和李思捷近年事業得意，愛情亦順心如意。三人「背後的女人」，對另一半都給予無限量支持，羨煞旁人。

不過人紅自然是非多，阮兆祥與李思捷就相繼在兔年被傳背女友「偷食」，後者被「無綫」節目《娛樂頭條》記者問及緋聞時，更試過毫不畀面地轉身離場。今次，「福祿壽」接受本刊獨家訪問，三子破天荒自爆「偷食」情史。

新年伊始，正是打開天窗說亮話之時。

叮春卷．密偷食

跟「福祿壽」做訪問，整個過程絕不會有悶場，說起「偷食」，王祖藍即鬼馬說：「春卷（李思捷女友王寶寶）要趁熱食！使乜偷啫？」阮兆祥亦搭上一句：「仲可以叮番熱嚟食，慢慢食都得！」

兩人一唱一和，只因李思捷近日新鮮滾熱辣被拍得在夜場搭「圓潤林欣彤」膊頭的密照，因而被指背着細他十九年的女友王寶寶「偷食」。不過李思捷淡定解畫：「其實去玩好正常啫！咁出得嚟玩，搭吓膊頭、咬吓耳仔，都係level one（第一級）嘅親密啫。有時去玩，個場嘈，就係咁o架啦，邊算偷食？」

李思捷直認喜愛夜蒲，有傳他在○八年於夜場借醉攬啜湯盈盈，相當不羈。當他背後的女人，並不易為。「玩係減壓嘅其中一個方法，我依家係玩還玩，都會尊重另一半嘅感受。」這粒給「春卷」的定心丸，會否令她安心晒？

那邊廂，阮兆祥是被傳背女友「偷食」的另一「福祿壽」成員，祥仔與拍拖十年的圈外女友Crystal一直感情穩定，去年底卻因與無綫主播何傲芝買枕頭而傳緋聞。面對傳聞，他維持一貫作風：「咁都唔錯嘅，話晒佢哋（王祖藍、李思捷）個個都單飛做晒封面人物，係爭我之嘛，有個『偷食』封面畀我威吓，都幾好吖！

「佢（女友Crystal）睇到都冇咩反應，咁佢信我嘅，都一齊咁耐啦！只係我唔明，嗰次我喺沙田開工，咁都畀人影到，仲蹺過中六合彩呀！」

翻查資料，發現阮兆祥屬零緋聞藝人，除了九四年被傳與黎瑞恩發展地下情，便是現任女友「阿桃」Crystal，多心啲想，難以相信他從未有過「偷食」之念。「哈哈！偷食？唔止諗啦！我成日都偷，趁我女朋友瞓咗，我就走入廚房，偷食杯麵、點心，咪食到咁囉。」

攬亞男．趕上車

相對兩位拍檔的「偷食」新聞，王祖藍明顯被比了下去，他亦不諱言，對拍拖年多的女友李亞男，絕對一條心。說起「偷食」兩字時，王祖藍亦從模仿政務司司長林瑞麟的生鬼，來一個一百八十度轉變，一本正經的說：「喺感情生活上，我唔係一個鍾意劈腿的人，一向都係咁，依家加上宗教（基督教）嘅規條，我連單獨同異性相處嘅時候都冇。

「有時亞男喺度，我都會車埋啲女同事，但係冇嘅話，我就唔會囉。除咗因為宗教之外，畀人見到都唔好啦！有啲嘢，係要避忌啲嘅。」