今年六月，楊思琦忽然單方面宣布與拍拖九年的李泳豪分手，隨即被踢爆秘密劈腿半年，瞞住正印男友與前香港跳水運動員吳帥暗撻，且偷食偷出餡，乖乖女形象瓦解。但楊思琦死撐是分手後才跟吳帥發展，圖洗掉勾佬污名，並極力否認已懷有第三者骨肉。不過紙包唔住火，隨住有餡身形日漸膨脹，今年九月，楊思琦決定逃匿美國安胎避開耳目。聖誕假期前夕，本刊記者終於在L.A.發現腹大便便的楊思琦與男友吳帥。 Boxing Day，李泳豪面對舊愛懷孕七個月的事實，酸溜溜的他望住舊愛新相，一口咬定說：「佢個樣好唔開心！」
坐完月返香港
大話開咗頭，為免穿煲就要諗計收科。據悉，明知有餡呃唔耐的楊思琦，早於七月已偷偷向無綫高層樂易玲請假半年，待九月完成她主持的《寵愛有家》及登台工作，大住四個月肚，由楊母陪同，潛水到美國安胎避風聲。據了解，現時七個多月肚的她，預產期為明年二月。「思琦同無綫仲有兩年約，佢無提過解約，只係請假請到三月，三月尾先返香港。聽講Andy（吳帥）因為成日要喺內地做嘢，唔可以陪喺女友身邊，所以思琦媽留喺美國陪住個女，陪到佢坐埋月，先一齊返。」知情者說。嫌李泳豪無前途，狠將九年情一刀切，楊思琦以為投靠有米歸宿唔使撈，豈料被李家鼎講中，上錯賊船！在香港住劏房及欠屋租的吳帥，臭史逐一被揭；即使近年轉返內地發展，據知也只是黐住內地富商搵食。
黐阿哥一家住
錯擒空殼，米已成炊的楊思琦唯有頂硬上。赴美安胎前不單搏命接騷，生日照去登台搵定奶粉錢，連安胎落腳地方，都是投靠胞兄，黐住兄嫂一家四口的L.A.平房。過去吳帥每次返港都住在楊思琦的清水灣半島寓所，食宿有女友搞掂，如今女友赴美待產，吳帥照樣一個崩唔出。十二月二十一日洛杉磯時間，本刊記者在楊思琦兄長位於當地市郊的寓所外等候，一層式的平房，面積約一千三百多呎，另有約三千多呎後園。該區是洛杉磯傳統華人社區，左鄰右里也以華人居多。由早到晚，一直未見有人出入，屋外也未見有任何車輛停泊，室內只透出微弱燈光。
男裝羽絨遮肚
翌日下午四時左右，記者終於見到幾乎全身密封的楊思琦，拖着行李喼出現，戴黑色絨帽，圍上頸巾，再加上大黑超的她，著住一件男裝羽絨，對比當日洛杉磯超過十二度的氣溫，思琦的打扮明顯刻意遮掩巨肚。離開家門後，楊思琦一個人孤零零行出大路，其間不時前後左右察看，相當警覺。平日行動敏捷的她步履緩慢，又經常停低回氣，孕婦易攰的舉止十分明顯。一直走到一間銀行的停車場入口處，楊思琦才轉入小路內等候。等了十分鐘，才見到吳帥駕着灰色寶馬駛入小路。要腹大便便的女友拖喼企街等，知衰的吳帥一落車，先把行李搬上車，再體貼地從後攙扶楊思琦坐上房車後座，讓她有較多空間休息及不用扣安全帶。之後吳帥坐上司機位前瞄了記者車一眼，便駕車絕塵而去。
遲到呵番
企街企足十分鐘，吳帥才駕車到達。等到鞱的楊思琦黑晒口面，知衰的吳帥嗱嗱臨幫女友放好行李，便扶實她上車，等女友下番啖氣。
美國生夠平
飛去美國生仔，唔好以為好貴，原來條數好抵。楊思琦選擇分娩的醫院，埋單只須繳付$8,000-$10,000美金，BB出世後可成為美國公民，認真經濟實惠。但美國主張自然分娩，無得擇吉時剖腹產子。
為舊愛痛心
遭九年楊思琦狠撇，李泳豪曾為分手哭至肝腸寸斷，就算常被追問楊思琦懷孕一事，他仍處處維護，言語間流露對舊愛未死心。本週一Boxing Day，本刊記者將楊思琦大肚相交給跟父親李家鼎到九龍城飲下午茶的李泳豪，見到分手半年，舊愛已大住七個月肚的事實，他邊看邊搖頭嘆氣，強忍淚水。至於睇到眼火爆的鼎爺，即場就寸楊思琦佗仔唔見得光，係件慘事！
李家鼎批生女
豪：李泳豪鼎：李家鼎壹：本刊記者豪：唉……個肚真係好大！在旁瞄了相片幾眼的鼎爺，反應仲大：嘩！乜籮咁大個肚，依家事實證明一切，佢大話終於現形！望住吳帥攙扶舊愛的相，不願接受事實的泳豪哽咽地說：呢個會唔會係佢阿哥？唔係吳帥！鼎爺聽到好勞氣：個×樣，一睇就認出係吳帥啦！壹：你接受唔到舊愛大肚嘅事實？豪：唔開心一定有，但我最難過係見到佢佗住BB個樣都唔開心。唉……大家都知個男人咩底細，如果換轉係我，一定唔會要思琦匿埋生仔咁慘，仲會陪住喺佢身邊。鼎：我戥佢痛苦呀！生仔生到咁鬼祟，你睇佢個樣苦瓜乾咁，佢同豪仔一齊，成日四萬咁口㗎！（之後鼎爺以一副相士口吻）佢佗B佗得咁低，我批佢一定係生女！壹：今年五月思琦仲有返李家過夜，你有無懷疑過BB可能係你？豪：一定唔係我！（壹：因為做足安全措施？）分手前大家各有各忙好少見，就算見面都無……總之肯定個B唔係我。壹：之前你仲抱住一絲寄望同思琦復合，依家仲有冇？李泳豪未開口，含住支煙的鼎爺已瞪大對眼搶先答：No way！帶埋個B嚟復合，咪搞到件事咁複雜！豪：（猶豫數秒）無可能！事情去到呢個地步，都應該畫上句號。不過將來佢有咩需要我幫忙，我仍然好樂意幫佢。在旁的鼎爺亦祝福她：希望佢真係幸福啦！
大話妹配充闊佬
楊思琦６月底自爆跟拍拖９年的李泳豪在４月已經分手後，被發現一腳踏兩船冇句真，大住肚講大話，最後更要匿去美國待產。她的另一半亦是空心老倌扮有錢，欠債纍纍信唔過，被追債追到上法庭。
婚禮唔想求其
據知，要匿埋生仔的楊思琦已計劃好等產後修身，明年中在香港補辦婚禮，希望結婚大搞，彌補匿埋生仔的缺失。不過從未為戀情挺身承擔，選擇龜縮的吳帥，卻為婚事曾一度跟女友意見分歧，鬧至不快。「Andy想一切從簡，提議去拉斯維加斯註冊結婚，但思琦係個傳統女仔，佢一直希望婚禮可以大排筵席，唔要求其咁搞。早排傳佢哋分咗手，其實兩個只係為婚事鬧意見，搞到唔係好開心啫！」楊思琦身邊密友透露。
收收埋埋
資訊發達，藝人千方百計封鎖私隱，即使結婚、生仔喜訊，如非必要，鮮有打鑼公開，玩神秘，一個目的，避開傳媒耳目。
朱麗倩
今年十一月廿八日奪得金馬獎影帝後，劉德華主動在官方網上暗示太太朱麗倩懷孕，但至今仍無人知道朱麗倩身在何處安胎。
林嘉欣
去年拍罷《唐吉可德》後失去蹤影，原來她未婚懷孕，藏身加拿大安胎，六月在當地與廣告導演袁劍偉註冊結婚，九月誕下女兒Kayla。
梁洛施
與李澤楷於○七年拍拖，行蹤一直飄忽神秘，直到○九年四月，Isabella在美國為男友秘密誕下李長治，事件曝光後轟動全城。去年七月，Isabella在美國舊金山誕下雙胞男嬰，成為一時佳話。 ####
廿二日，腹大便便的楊思琦從哥哥的寓所拖喼步行到街角，動作緩慢。為怕被人認出，揭發她大肚，她刻意著件寬身的男裝羽絨遮肚，但7個月身孕仍然清晰隆起。
泳豪：佢個樣好唔開心！鼎爺：大話現形啦！
警覺性高的她，起初為免被人發現，一直背向大街等男友，並致電催促他。直至男友到，她才肯擰轉面。
楊思琦赴美安胎都係投靠阿哥（上圖），住在他一家四口，面積千三呎的平房。
到美國陪女友度佳節的吳帥，當日一身打扮，加埋薯爆髮型，一個字：土！
細心的吳帥安排大肚思琦坐後座，好讓她不用扣安全帶及多點空間伸展。
在美國待產，楊思琦依然有玩微博，喜歡吃甜品的她，透露自己瘋狂食雪糕。另悶極無聊的她，又拍下「摘月光」的相放上微博。
有孕兩個月早前主持《寵愛有家》節目，已有身孕的楊思琦，把頭髮剪短，著鬆身衫及健康涼鞋上鏡。
今年五月，楊思琦以女友身份陪李泳豪打邊爐慶祝生日，未幾還傳出婚訊。
一直龜縮的吳帥，於九月返港現身，但外出時故意坐車尾，由思琦兩母女幫他掩護擋駕。
李泳豪在處境劇《結•分＠謊情式》中情節，跟現實一樣，被女友拒婚狠飛，好應景。
曾與楊思琦隔空開拖互插的李泳漢，得悉女方懷孕屬實後說：「當日邊個講大話，今日終於真相大白。」
吳帥（右一）跟好友俞越（前排中）都曾經是香港游水隊隊員，相識多年，吳帥跟楊思琦戀情曝光後，俞越一直代老友發言。
○七年，楊思琦跟李泳豪同居，兩人不時拖狗出街。
蘇民峰早前獲邀上楊思琦主持的《寵物》節目，已批她會未婚懷孕。
在無綫人緣麻麻的楊思琦，近年冇乜劇拍，只做節目主持，不過跟豪仔情變，依然獲樂小姐力撐她冇一腳踏兩船。
留言列表
