佘詩曼搶人夫失敗　嘉穎唔翻啅　佘詩曼人財兩失 Face 週刊 240期 @ 818 娛樂八掛大放送★

入行14年終於捨得告別娘家無綫北上闖蕩，佘詩曼臨別秋波套《天與地》贏盡口碑、北上創業劇《建元風雲》每集25萬片酬冠絕港星，用行動證明自己有價有市走得漂亮！可惜女強人往往事業愛情不能兼得，本刊獲悉翻嗒視帝鄭嘉穎純屬流料、半年前姣獵已婚叠水證券董事的Tony Shiu（蕭猷華）又重回愛妻懷抱，36歲姣佘電力不勝當年，使唔到男人錢，惟有靠自己賺辛苦錢！

雖然平均收視僅得23點（約147萬觀眾），破格《天與地》勝在肯創新，有口皆碑為無綫贏回不少年青電視觀眾，一眾熟男熟女主角亦再次成為娛樂圈焦點，連女主角佘詩曼亦再被翻炒與舊愛鄭嘉穎愛火重燃。

一家晒溫馨
其實，阿佘傳與鄭嘉穎復合前，亦有一段「圈外情」。今年5月，有報道指僑豐證券董事Tony Shiu向太太提出離婚，破壞二人婚姻的疑似小三，正是有「姣佘」之稱的佘詩曼。半年前深陷「佘」洞，撇低嬌妻同兩個年幼女兒，經常約佘出洞劈酒又飯聚。之不過鳥倦知還，本刊發現，今個聖誕Tony Shiu突然黐家做好爸爸，在社交網絡上不斷上載幸福家庭相，去到邊都同太座有影皆雙。聖誕期間適逢大女6歲生日，一家四口更在迪士尼溫馨慶祝，擺明撇清姣佘引力，重投正印懷抱。

投入家庭
據知情人士透露，小三情緣，無論對Tony定阿佘來說都只不過是逢場作戲，知情人透露：「Tony好鍾意黐女星玩，阿佘三月約滿無綫後、新劇《建元風雲》未開鏡，同Tony一樣爛玩又爛飲，Tony條件又唔差，陳早茵（陳欣健女兒）介紹佢哋識咪咁囉。不過阿佘始終太叻性格太強，新鮮感過咗，Tony都知阿佘唔啱自己，冇理由咁輕易放棄大好家庭同兩個女！」向來Tony有事冇事都愛在社交網絡公告天下，半年前在facebook轉發離婚潮文、暗喻婚姻變質，最近Tony突然變番住家男人，重新投入家庭生活，可見與阿佘舊情已成過去，冇咗年薪數百萬的大碼頭，阿佘金龜夢亦告破碎。

麥玲玲：唔使吼港男
眼見同齡同輩嘅女藝人一個二個嫁得出，有啲仲有埋餡，堪輿學家麥玲玲叫阿佘唔使驚，一定嫁得出喎：「佢五官其實生得好好，雖然係有啲硬朗，但係無損異性緣，38歲已經有機會嫁！不過佢性格好強、又有好勝心，同人一齊連桃花都一齊帶旺，搞到唔爭唔得。我建議阿佘拍拖要低調處理，兼且快刀斬亂麻，最好係揀唔同地方出世嘅另一半更有機會開花結果，所以佢條命，好容易似郭羨妮、蔡少芬一樣，同香港以外男士閃婚！」

錢銀最親
唔只做唔成小三，最近盛傳阿佘翻嗒舊愛鄭嘉穎亦屬流料。「阿佘份人敢愛敢恨，從來唔會拖泥帶水，鍾意時就話奮不顧身、分手後好少會食回頭草。」知情人事說。翻兜風雲，鄭嘉穎暫釘截鐵話「冇復合過！」，阿佘亦曾對內地傳媒表示冇可能：「不知道這個消息哪裏來的。我現在工作檔期排得很滿，沒有時間顧及個人感情問題，愛情要講緣分，不能着急。」事業愈爬愈高，感情卻屢打敗仗，阿佘離開無綫，明顯是志在搵銀自食其力的舉動。鄭嘉穎榮升視帝再憑《步步驚心》走紅，片酬才暴漲至25萬一集，反觀阿佘今年三月離開無綫後，連簽幾套內地劇《審死官》、《帶刀女捕快》同《建元風雲》已經達到25萬天價，拍三套劇集片酬已經抵回無綫辛勞十年，難怪阿佘認錢唔認人，賺錢第一、感情遲啲先講啦！

冇米粥后
在單親家庭長大、由媽媽獨力湊大的阿佘，自細性格獨立剛強，在事業上要風得風、在愛情上出手亦快狠準。不過到手的有時不見得是筍盤、就算盤筍亦未必可以安全長揸，結果煲到今時今日，都係冇米粥。

02年陳浩民合拍《飄忽男女》撻着，戀情前後維持長達6年，最後因為難忍男方花心斬纜。上月陳浩民背住臨盆在即新婚妻子借醉行兇，阿佘呢次算時運高。

04年馬德鐘呢頭與陳浩民維持異地戀，阿佘在港與人夫馬德鐘拍攝《驚艷一槍》時撻着，一度激到馬太離家出走。

06年吳卓羲
06年拍劇集《歲月風雲》小生殺手與姐仔屠夫一拍即合，還傳阿佘出手闊綽送車又送表。吳最近心繫北方佳麗張馨予，證明有時女方唔使有錢，最緊要有青春有手段有身材。

09年陳豪 09年至10年間，阿佘一口氣與陳豪合作《天與地》、《宮心計》及《公主嫁到》三部劇集，吼正廖碧兒忙釣金龜乘虛而入。 ####

翻嗒嘉穎屬流料，電擊證券董事大好家庭亦失敗，回復單身阿佘最近多次表示愛情是奢望。